Vawiin khan Fisheries Department chuan Aizawl District huamchhunga fish farmer te tan training a buatsaih a. Training hawnna inkhawmah Pu K.Lalrinliana, Minister of State, Fisheries Department chu khuallian a ni.

Pu K.Lalrinliana chuan sanghaa Mizoram a intodelh theih nan tihtakzeta tan lak a tul thu a sawi a. India ram pum thlirin hectare khata zau dilah kum tin chawhrualin sangha quintal 30 an thar theih laiin Mizoramah chuan hectare khatah quintal 12 vel thar thin ang kan ni a, midangin an tih theih hi Mizote pawhin kan ti thei tih rilru pua inngaihtuah thar turin Minister chuan sangha khawitute a chah. Sawrkarin anmahni tanpuina tur scheme hrang hrang hmanga sum a pek te, Fisheries Department-in sangha khawi dan leh enkawl dan, hlawk zawka sangha thar chhuah dan an zirtir thin te hmang tangkai tura fuihin state dang atanga sangha lakluhte luahlana Mizoram mipuite kham kham khawp sangha kan thar chhuah theih nan Minister chuan fish farmers te tihtakzeta tang turin a fuih a ni.

Minister hian Fish farmer panga hnenah Welfare of Fishermen scheme hnuaia in sak tanpuina second installment a hlan a ni.

He huna Guest of Honour Pu Thlamuana, Fisheries Secretary chuan fish farmer-te Department ngheng hnai turin a chah a, a thlawna sum dawn aiin thiamna leh taimakna a hlu zawk, a ti. Sawrkar chuan farmer-te tuamhlawmna tur scheme chi hrang hrang a ruahman thin a, heng atanga tanpuina sum dawngtuten dik taka hmang turin a chah bawk.

Vawiin programme hi Director Pu F Vanlallawma’n a kaihruai a, Fisheries Director kalchhuak Pu C.Laldawngliana pawhin thu a sawi. Pond Management & Common Carp breeding tih thupui hmangin fish farmers te hi Fisheries Extension Officer Pi Zomuansangi’n a zirtir a, sawihona leh zawhna leh chhanna hun hman a ni bawk. Tun dinhmunah Mizoramah fish farmers 16,223 an awm a, tuikhuah zawng zawng belhkhawm hi 5477 hectares a zau a ni. Aizawl District huamchhungah fish farmers 2063 awmin tuikhuah zau zawng belhkhawm hi 480hectares a zau a ni.