Mizoram State Games-2019, December Ni 9-13, 2019 chhunga neih tura 24-Champhai South Assembly Constituency  tana hmala tura din, 24-Champhai South Assembly Constituency Level Committee chu vawiin chawhnu khan an Chairman Pu TJ Lalnuntluanga, Law and Judicial Minister leh bialtu MLA nibawk hovin Circuit House Conference Hall-ah an thukhawm.

Pu TJ Lalnuntluanga chuan Mizoram State Games 2019 chu infiamna chawisana hma kan sawn  theihna tura chhawpchhuah, Assembly Constituency hrang hrangte  inelna tura ruahman  anih thu sawiin,  theihna leh thiamna nei thalaite zawnchhuaha,  tihhmasawnna tur a ni, a ti a. Infiamna pui tham tak MLA bial hrang hrangte telna tur anih angin bial leh District hmakhua ngaia  theihtawp chhuaha ngaihtuahna sen angaih thu a sawi a. Infiammi leh mawhphurhna kengkawhtu zawng zawngte chu rilru zau tak  pu a mahni chanvo theuhte tihlawhtling thei tura ngaihtuahna seng tura chahin,  mahni khua leh Constituency aiawh tur an nih angin bial tihmingtha tura phut let nei miahloa theihtawp chhuah turin a chah a ni.  

He hunah hian Secretary report Tv. Jacob Lalnunhlima hnen atanga ngaihthlak anih hnuah, Sports discipline hrang hrang mawhphurhna neitute hnen atangin hmalakna leh hmachhawpte ngaihthlak niin, medal la ngei thei tura beiseiawmte  chauh intirh nise tih a ni a.  Sum mamawh zah tur leh sum tuak dan tura hmalaknate Fund Raising Committee leh Fin Secretary hnen atanga ngaihthlak anih hnuah sum tuak leh hman dan turte uluk zawka zirchian leh nise tih a ni a. State Games nghahna hmun Aizawla  thlenna tur leh mamawh tur awm thei dangte pawh he hunah hian sawiho niin, Champhai South Assembly Constituency Flag leh Jersey neih nise tih a ni a, a rawng atan Rawng Pawl Sky Blue chu lungrual taka thlan ani bawk.

Meeting-ah hian Pu Rex Zarzoliana Vanchhawng, SP Champhai, Advisor; Pu Zoremthara Ralte, SDO Sadar, Working Chairman, SDO Sadar; Dr. Lallawmkima, DIPRO bakah, Mizoram State Games 2019 inpuahchahna atana Champhai South bial chhunga mawhphurhna neitu hrang hrangte an tel a ni.