Vawiin khan Revenue Minister Pu R. Romawia chuan Settlement Office, Land Revenue & Settlement Aizawl District Office Building thar New Capital Complex ami chu a hawng a. Office Building thar hawnna inkhawmah hian  Pu JH Rothuama, MLA,Chairman NLUP Implementing Board chu khualzahawm a ni. 

Khuallian Pu R. Romawia chuan Revenue Department chu department pawimawh tak nitin mipui te nena indawr reng leh Mizoram record pawimawh vangtu anih angin thawktute pawh thahnemngai taka mipui tan theihtawp chhuah chunga, thubuai hlabuai awmlo tura  rinawm leh fimkhur taka hnathawk zel turin a fuih a. Office Building thar changtlung tak neih ani ta chu lawmawm a tih thu sawiin uluk taka enkawla luahzui tur leh hmasawnna atan lungrual taka thawk ho turin Revenue Aizawl District office thawktute a chah nghal bawk a ni. 

Khual zahawm Pu J.H Rothuama pawhin thusawiin Revenue department dan mumal tak hnuaiah Mizoram lei man te khawn ani thin chu lawmawm atih thu leh hna pawimawh tak a nih thu a sawi a. Felfai zawka records vawn nan land records computer a thun(digitalisation) chu chak taka kalpui a tul, a ti a. Mizoram hmasawn nan ngaihtuahna senga hma la zel turin kalkhawmte a fuih bawk a ni. 

Settlement Office, Land Revenue & Settlement Aizawl District Office Building thar hi ni 25.5.2010 a sak tan niin ni 16.9.2015 khan sak zawh a ni a. Cheng nuai 311.75 senga sak niin chhawng ruka sang a ni a, a pumpuia a zau zawng hi 1795.35 square metres a ni. 

Land Revenue & Settlement Aizawl District Office ah hian tun dinhmunah thawktu 82 an awm mek a. Financial Year 2016-17 chhung khan Land Revenue & Settlement Aizawl District Office hian Tax khawn atangin cheng 5,40,68,459 lalutin, Non-Tax atangin cheng 49,46,514 an lalut a, Registration & Stamp atangin cheng 1,82,25,571 an lalut bawk a ni. 

Office Building thar hawnna inkhawm hi  Land Revenue & Settlement Department Secretary Pu R. Lalramnghaka MCS chuan a kaihruai a, Pu RL Rinawma IRS(rtd) Principal Adviser to CM leh Pu Pu N. Zokunga MCS(rtd) ten thu an sawi bawk a, Pu Hrangthanga Zote EE, PWD Aizawl Project Division-I chuan Technical Report a pe a.  Settlement Officer Pu Lalvenhima MCS chuan Aizawl District Office report kimchang  pe in Land Revenue & Settlement Department Director Pu C. Lalpeksanga MCS chuan lawmthu sawina in hun a khar a ni. 

Hawnna inkhawm hi Pu Vanengmawia IAS(rtd) , Pu John LT Sanga Additional DC Aizawl te’n hmanpuiin Land Revenue & Settlement Directorate leh Settlement Office Aizawl District staff te an tel kim hle a ni.