Vawiin khan Chief Minister Pu Lal Thanhawla hovin Mizoram State Health Care Society (MSHCS) chu Governing Board Meeting vawi 15-na neiin Chief Minister Office ah an thukhawm a. Meeting ah hian Finance Minister Pu Lalsawta, Health & Family Welfare Minister Pu Lal Thanzara, Commissioner & Secretary, Health & Family Welfare Department Pu Lalrinliana Fanai, Finance Secretary Pu Lalmalsawma leh MSHCS Member-te an tel a ni. 

Meeting ah hian MSHCS a inziak lut an pun chhoh leh inenkawlna man a san chhoh avangte leh Bank interest rate a tlakhniam avangtein thla thum dana Corpus Fund pung tlingkhawm atanga cheng nuai 300 Finance Department in sum a pek thin chu a indaih loh thu sawilan a ni a. Hemi atana atira ADB Loan ‘Corpus Fund’ chu belhchhah a tul tawh tiin sum belhchhah tur zat te leh hemi atana Mizoram Sawrkarin a thawh tur chu zirchian nise an ti a. Chutih rualin tha taka amah leh amah inchawm zoa kalpui zel anih theih nan Sustainability Plan siam a, a tul leh pawimawh, premium man san te leh a coverage te huam telin ennawna zirchian nise an ti bawk. 

Tunhnaia Council of Ministers thukhawmin  Sawrkar hnathawk te Medical Reimbursement zirchianna Sub-Committee on Medical Reimbursement Report an pawm chungchang pawh meeting ah hian sawiho a ni a. Report ah Sawrkar hnathawk te MR Bill pektlak a nih hmain MSHCS-in Medical Bill te enfel leh endik rawt a ni a, heng ti turah thawktu an mamawh belh tur zat chu MSHCS in lo chhut se an ti a. Governing Body a Agenda chhawpchhuah dangte pawh meeting chuan an pawm a ni. 

Sawrkar hnathawk nilo ten damlo nikhuaa damdawiin an luhna inenkawlna senso an hmuh let theih nan Mizoram Health Care Scheme hi April 2008 atang khan Mizoram sawrkarin a kalpui tan a. 2010 khan he Scheme atan Asian Development Bank in sum vaibelchhe 155.56 a puk tir a, hei hi Corpus Fund atan dah ani a. He sum pung tlingkhawm atangin Health Care bill te hi pek ani thin a ni. Mizoram mipuiin nasa taka chhawrin an tangkaipui mek a ni. RSBY hi Sawrkar Laipui Scheme niin BPL chhungkua bik a huam a ni.  

September ni 1, 2010 leh August ni 31, 2011 inkar khan MSHCS ah hian mi 40185 inziak lutin claim bill 6276 ah cheng 6,88,84,983 pek ani a. Hemi hun chhung vek khan RSBY a mi 11951 inziak lutin claim bill 784 a cheng 38,30,775 pek a ni a. April ni 1, 2016 leh March ni 31, 2017 inkar hian MSCHS ah mi 1,15,221 inziak lutin bill claim 5770 ah cheng 14,53,40,181 a awm a, hemi zinga bill 833 cheng 2,44,85,211 hi la pek loh a ni a, a bak chu pektlak vek a ni tawh a. Hemi hun chhung vek hian RSBY ah mi 1,94886 inziak lutin bill claim 19054 ah cheng 10,14,24,247 pek a ni tawh a ni.