SEDP hnuaia din Land Revenue and Survey Board chu vawiin khan an Chairman, Land Revenue & Settlement Minister ni bawk Pu Lalruatkima hovin Secretariat Conference Hall, MINECO-ah board hmalak dan tur sawihovin an thukhawm a, Deputy Chief Minister Pu Tawnluia chu Chief Minister aiawhin a tel a, Board member te leh official sawmbikte an tel a ni.

Deputy Chief Minister chuan an thutkhawm chhan chu SEDP hnuaia hmalakna atana inbuatsaihna innghahna tak tak a nih vangin hna pawh a hautak dawn a ni a ti a.SEDP hnuaiah ram leilung hmang tangkai ngeia intodelh chu an tum bulpui ber a nih avangin Land Revenue and Survey Board mawhphurhna pawh a sangin member te pawhin an rilru leh ngaihtuahna zawng zawng senga theihtawp an chhuah a ngai dawn a ni, a ti.

Board Chairman Pu Lalruatkima pawhin SEDP hnuaia hnathawh turte hi ram leilung behchhan (land-based) deuh vek a ni a, heng atana ram theh tur ruahman a engkim duan fel hi Land Revenue and Survey Board kovah a tlak avangin an mawhphurhna a sang hle a ni a ti a, he hna thawk tur hian Department mi leh sa te hman tangkai an ngaih dawn avangin thawktu indaihlohna nasa tak karah theihtawp chhuah a ngai dawn a ni a ti a. Sawrkar ram humhalh a a tul anga hman kawngah thuneitu department hrang hrangte leh khawtlang hruaitute bakah mipuite tanrual a ngai hle a ni a ti. SEDP atan ram hman theih eng ang nge kan neih tih zirchian a ngai a, Board dangte nen awmze nei deuh a kal tlan a pawimawh dawn a, SEDP hnathawh tan hma turin land identification tih ran a tul hle a ni a ti.

Vawiin thutkhawmah hian Land Revenue and Survey Board kalphung tur leh inrelbawl dan tur te rel a ni a, Expert Committee on Land Reforms Report thlirho a nih bakah Mau hmanga Mizoram economy tihhmasawnna tur atana land survey neih zawh tawh chungchangte sawiho a ni.