Mizoram (Land Revenue) Act, 2013 chu June Ni 1, 2013 atang khan hman tan niin ram zau lutuk leh ram hman tangkai loh neih tihtlem dan tur te, ram pek dan leh land record fel leh langtlang zawk neih dan tur te, zofate chanvo humhalh tura ram inhlanchhawn dan khuahkhirhna fel tak te, ram chungchanga thubuai chinfel dan felfai zawk nei tura Revenue Court leh Revenue Tribunal din dan tur te a tel a. NEDP hnuaia din Land Reforms Committee chuan a hma aia felfai leh kimchang zawkin hma an la a, an report siam chu Expert Committee on Land Reforms-in en lehin an rawtna angin Mizoram (Land Revenue) Act, 2013 pawh thawm that tura ruahman a ni.

Mipuiten computer leh internet hmanga Revenue Department an dawr zung zung theih nan internet kaltlanga dilna hrang hrang thehluh leh chhui zui theihna tur te, online property registration system te, land record internet hmanga vawn leh mahni in atanga en theihna tur  software siam niin peihfel mek a ni a. Ram chhiahte pawh online-a pek theih thuai a ni ang. Serchhip district hi land record-te computer leh internet kaltlanga vawnna hmasa ber (pilot district) a ni a, kum 2018 chhung hian computer hmanga  record vawnfel hman ngei tum a ni. Aizawl District hi online registration leh record hlui computer-a vawn thatna tur (modern record room) atan pilot district a ni a. Modern Record Room enkawltu tur staff-te training pek mek a ni.