Food & Drugs Administration, CMO Office bultumin vawiin khan I&PR Auditorium, CHANEM Building Champhaiah  Damdawi leh Ei leh In chungchang zirtirna Food Safety & Drugs Awareness Campaign-neih  a ni a. He hunah hian Pu Lalsawma Pachuau, Joint Director (Food & Drugs), Controlling and Licensing Authority, D&HS chu khuallian niin, Dr. Lallawmkima, DIPRO Champhai chu khualzahawm a ni.

Khuallian  Pu Lalsawma Pachuau chuan ramdang atanga ei leh in lakluh 95% zet chu Food Laboratory a enfiah loh anih thu leh kan taksa vawng hrisel turin sorkar hriatpui leh hrisel chauh kan ei theih nan khawtual mite fimkhur a pawimawh thu a sawi a. Damdawi tha chauh ei anih theih nan tanho a tul thu a sawi bawk. He hunah hian Champhai DIPRO Dr. Lallawmkima chuan ramdang atanga Ei leh in bakah damdawi chi hrang hrang lakluhte chu hriselna tichhe theia awm theih vangin mithiamte enfiah lo chu ei mai lo turin a chah a.

Vawiin hun hmanna hi Champhai CMO Dr. Vanlalnghaki'n kaihruaiin,

Mizoram Drugs Controller Pu Lalsawma, Food & Drugs Deputy Director Pu F. Lalliantluanga-ten zirtirna an pe a.  Champhai District Food & Drugs Assistant Director Pi C.Ramdinmawi'n District chhunga hmalakna tlangpui tarlanna a nei a. Kumin July atanga September thla  inkar a Damdawi leh Ei leh In enfiah (Quality Test) tura Laboratory a thawn zat chu Damdawi Sample 65 leh Eichi (Food) Sample 35 anih thu a sawi bawk a ni.

Food Safety & Drugs Awarness Campaign hi Khawzawlah neih anih bakah Champhai khawpui chhunga zirna in hrang hrangah neih zui a ni a. Fimkhur tura inzirtirna hunah hian zirlaite bakah Tlawmngai pawl (YMA,MHIP leh MUP) bakah Village Council memberte an tel thin a ni a, zawhna leh chhanna hun hman anih bakah sawihona hun hman thin a ni bawk.