Land Revenue & Settlement Minister Pu R. Romawia chuan Directorate of Land Revenue & Settlement a thawktu a te ber atanga a lianber te chu ramro bawm kawltute an nih angin an hnathawhah an fimkhur hle a tul a ni, a ti. He thu hi vawiin a he Department tlawh a, hnathawkte a kawm na a a sawi a ni.

Minister chuan mimal, sorkar leh vantlang ram reng reng diktaka teh fel te, an ram neih leh huamchin chhinchhiah fel thlap te chu thil pawimawh leh tul tak a ni, a ti a. Ram chungchangah thubuai hlabuai tam tak a pian theih avangin, he Dept. a thawktute chu fimkhur taka Dan ang thlapa an thawh a tul a ni, a ti bawk. Minister chuan mi hausa leh awmthei ten enkawl loh ram zau pui pui an neih laia mahni chenna tur tak ngial pawh neilo mirethei an awm chuan, hmundanga kan hmuh thin thil thalo tak “Zamindari System” hi Mizoramah pawh kan hlat lovang tih a hlawhawm a ni tiin, thawktute chu tan la a, in hmun lo ram pek leh sem kawngah pawh fimkhur hle turin a chah a ni.

He huna Minister tawiawmtu, Parliamentary Secretary Pu H. Zothangliana pawhin thusawiin, Land Revenue & Settlement a thawktu te chu Minister leh amah ngei pawh bengvar thin tura chahin, thawh hona tha tak an neih a duh thu a sawi a. A tangkai theihna apianga hman a inhuam dan te a sawi a ni.

Vawiin a inkawm khawmna hun Technical Section, Directorate of Land Revenue & Settlement building a buatsaih hi Department Director Pu Zarzosanga’n a kaihruai a. Hnathawktu ten an hnathawha an harsatna tawh thin dan leh a sutkian nana an mamawh leh hmalakna te an sawi a ni.