Pu John Siamkunga, MLA leh Chairman Mizoram State Law Commission a bial chhung Tuipui ral khaw hrang hrang-a lawmthu sawia fehchhuak mek chuan vawiin chawhma kan Muallianpui-ah mi 126 hnenah Labour Welfare Fund hnuaia Children Education Assistant atan Rs. 4,90,000 a sem. A bial chhung khaw hrang hrang a lawmthu sawia thang mek Law Commission Chairman chuan thu sawiin Muallianpui khawtlang mamawh a hriat chian avanga hmasawnna hnathawh hrang hrang chak taka kalpui a nih theih thu te, S. Vanlaiphai atanga Muallianpui kawng paving hna thawk tur contractor pawh thlan fel a nih tawh thu te, he hna hi rei lo te-ah tan theih a beisei thu te, hei bakah hian Thingsai tlang dung leh Muallianpui inkalpawhna tur kawng laih hna thawh mek a nih thu te a tarlang a, hei bakah hian Muallianpui khawtlang mipui amah lo lawma, lo hmuak tute chu hmasawnna hna thawhpuia, theih tawpa amah tawiawm turin a sawm nghal bawk a ni.

Labour Welfare Fund sum sem inkhawm hi Pu Francis Lianmawia, Asst. Welfare Commission chuan a kaihruai a, mi 7 hnenah Rs. 2,000 theuhin an sem a, a bak mi 119 hnenah Rs. 4,000 theuh, avaiin mi 126 hnenah Rs. 4,90,000 a sem ral a ni, hemi hnu hian South Lungleng a tlawh bawk a, Tuipui 'D'-ah zanriah eiin Hnahthial-ah a rik ang. Law Commission Chairman hi a nupui Pi Lalawmpuii, Official leh Party hruaituten an tawiawm a ni.