752/2026-2027

Dated Aizawl, the 29th May, 2026 : Land Revenue & Settlement (LR&S) Minister Pu B. Lalchhanzova chuan vawiin khan Directorate of Land Revenue & Settlement Conference Room-ah online-a chhiah pekna portal Online Tax Portal Version 2.0 - “landtax.mizoram.gov.in” a hawng. He online portal hi Information and Communication Technology (ICT) Department-te nena tangkawpa siam a ni a, a hawnna inkhawmah hian ICT Chief Informatics Officer Pu James Lalnunmawia leh ICT official dangte pawh an tel.

Pu Lalchhanzova chuan a hmuna khawn ngai lova mipuite’n mahnia awlsam zawka chhiah an pe thei tawh tur chu lawmawm a tih thu a sawi a, khawvelin chankanna kawngah ke a pen rualin Mizo mipuiten an pen ve zel thei a ni, a ti. Ram hmasawn leh hnam zahawm ni thei turin mipuiten chhiah an pek tam a, an pek that a ngai, a ti a, Mizote chu mahni kea ding thei (self-reliant) ram ni turin LR&S Department chuan hma a la tan a, hetiang technology lama hmasawnna hian India ram puma hmasawnna tehna kawngah pawh dinhmun tha zawkah Mizoram chu a chawikang a, state dangte tih dan en ringawt bik lova state dang te’n min entawn ve theih nan hma lak zel a ni chu lawmawm a tih thu a sawi bawk.

Pu C. Lalrinfela, ICT Department-a Informatics Officer chuan technical report a pe a, Version 1 nena a danglamna lian ber chu Annual Performa hmanga siam vek a ni tawh a, hei hi kum bithliaha mipute tan chhiah pek tur zat felfai taka duanna a ni. He portal hmang hian SMS hmangin chhiah pek hun leh chhiah pe lote thinna tur duan a ni a, Bharat Bill Payment System (BBPS) Service awmna mobile app GPay, PhonePe, BHIM, Amazon Pay leh a dangte hmangin Service list atangin Land Tax leh Zoramchhiah chu Family ID emaw Ration Card No. hmangin a pek theih tawh dawn a ni.

Land Tax leh Zoramchhiah pekna atana record pawimawh Ration Card Number leh Phone Number link thar emaw link that ngaite tan office kal kher ngai lovin portal hmangin a thehluh theih tawh dawn a. Land Tax pe tur tan Family ID hmanga pek a ngai tawh dawn a, mahni Family ID la hrelo tan portal ah hian a zawnna dah a ni. Lawngtlai leh Siaha District tih loh chu District zawng zawng an onboard tawh a, district onboard tawh zawng zawng te chuan online hmangin Land Tax leh Zoramchhiah an pe thei tawh dawn a ni.

Heng bakah hian thawktu lam tana tangkai tur belh a awm nual bawk a, a langsar zual te chu:

1. Land Tax leh Zoramchhiah te hi Annual Proforma behchhan a nih taka vang hian report leh estimate felfai zawk siam kawngah leh chhiah pe tha leh thalo chhinchiah kawngah thawktute a tichhak thei dawn a ni.

2. Rate leh Chhiah chawi tur zat thlak (revised) anih pawhin harsatna a awm tawh lo.

3. Surveyor leh Manual Fee collection ti thin tan pawh payment record felfai taka chhinchhiahna (Abstract Collection – Online, Manual, Cheque) belh a ni.

4. Chhiah Target leh Revenue Statistics te hmuh mai theihna belh a ni a, tin hard report generate na belh a ni bawk. Heng bakah hian daily collection report en na siam tel a ni.

5. Periodic Patta leh House Pass (Validity neite) hi automatic-in system hian zar dar 12 pelh chiahin a block nghal zel tawh dawn a ni.

6. Land Tax leh Zoramchhiah master record ah hian tihdanglam (change) awm apiang system hian a chhinchiah zel tawh dawn bawk a ni.

A hawnna inkhawm hi Pu Vanlalmawia, LR&S Secretary chuan a kaihruai a, Pu R. Lalthazuala, LR&S Director chuan lawmthu sawiin hun a khar a ni.