538/2024-2025

Khawzawl, 22nd May, 2023: Larsap Dr. Hari Babu Kambhampati chuan Chhanchhuahna Home, Zuchhip hmun hlui, Khawzawl tan ‘Financial Assistance to Orphanage/Home’ hnuaiah tanpuina cheng 23,300 a hlan a.  Larsap aiawhin tanpuina sumfai hi Khawzawl Bawrhsap Pu K. Lalrohlua chuan vawiin khan a pisa-ah a hlan a ni.

Khawzawl Bawrhsap Pu K. Lalrohlua chuan Khawzawl District chu ramri hrul a nih angin ruihhloin a run nasa hle a ni, a ti a. Ruihhlo tirem tur hian District Administration chuan theihtawp a chhuah a, NCORD kaltlangin sikul naupang leh kohhran inkhawmah ruihhlo ti lo tura inzirtirna kalpui a ni tih a tarlang. Ruihhlo dona kawngah a la ti ve lo ten an tih chhin lohna tura hmalak chu ngaihpawimawh ber a tul a ni, a ti bawk.

Chhanchhuahna Home Director Pu Aldrin Zomuanthanga chuan he hunah hian Home chanchin tlangpui report a pe a. Chhanchhuahna Home hi Zuchhip Hmun Hlui Humhalhtu Pawl te nen tangrualin kum 2020 November atang khan kalpui tan a ni a, rawngbawltu 8 awm mekin, mi 30 bawr vel engtik lai pawhin an enkawl reng tih a sawi a. Home hi Khawzawl leh a chhehvel khaw hrang hranga ruihhlo ngai ten an pan khawm thin a, batch khat hi thla khat zel a rei kalpui a ni. Pu Aldrin Zomuanthanga hian Home hungna (fencing) mumal zawk an mamawh thu te, Home pan chhohna kawng (Approach Road) siam that a tul thu te leh Choka thar an mamawh thu te a sawi bawk.