1445/2024-2025

AIZAWL; the 5^th August, 2024: Vawiin chawhma dar 11:00 khan Conference Hall, Dept. of Education, Mizoram University-ah Mizoram Larsap Dr.Hari Babu Kambhampati hovin  “Protect the Elusive” tih thupuia hmangin International Clouded Leopard Day hman a ni. He International Clouded Leopard Day hi 4^th August a ni a, mahse he mi ni hi Sunday a nih avangin vawiinah programme hi hman a ni. Vawiin International Clouded Leopard Day pual programme hi Zoological Department, Mizoram University te buatsaih niin, Society for the Preservation of Endangered Carnivores and their International Ecological Study (S.P.E.C.I.E.S) leh Riahrun Tours ten an sponsored a ni.

Vawiin Khawvel huap Kelrâl Ni (International Clouded Leopard Day) pual programme-ah hian thu sawiin, Larsap chuan Clouded Leopard (Kelrâl) hi ramsa vang tak a ni a, Mizoramin hetiang Ramsa kan la neih hi kan vannei hle a ni. Mizorama kan ramsa vang tak leh  mang mai theih dinhmun a din mek te leh an chenna ramngaw humhalhna leh ven hi Mizoram mipui te mawhphurhna a ni a, kan ramngaw leh ramsa duhawm tak takte  hi kan tu leh fa te tan I humhalh tlat ang u, tiin kalkhawm te a sawm. Larsap chuan vawiina Kelrâl Ni kan hman mek lai hian kan rilruah Mizorama ramsa leh nungcha hrang hrang, humhalh lova mang mai theih dinhmuna ding mek te, an hlutzia leh humhalh an tulzia min hriattir se, an chenna ramngaw pawh ti chereuh mai lova, duat taka enkawl a, humhalh tlat turin kan nih zawkzia a tharin min hriat nawn tir leh rawh se, a ti.

Larsap Dr.Hari Babu Kambhampati chuan International Clouded Leopard day pual hian Mizorama Kelrâl leh ramsa dang te, kan ramngaw, lui leh nungcha dang te humhalhna kawnga thawktu zawng zawng te hnenah lawmthu  sawiin, tha thlah lova kan ramsa leh ramngaw te humhalhna kawnga  thawk zel turin Mizoram mipui te a ngen bawk a ni.

Larsap hian “Conservation of Clouded Leopard in Mizoram” tih thupui hmanga Online slogan writing competition a lawmman dangtu :1st- Joseph Lalchhanchhuaha,2nd- Mesak B. Laltlanchhuaha leh 3rd- H. Zothanpuia te hnenah lawmman a sem nghal bawk a ni.

Vawiin International Clouded Leopard Day pual programme-ah hian Vice Chancellor MZU, Dean, School of Life sciences, PCCF, EF&CC   leh HoD, Department of Zoology ten thu an sawi bawk.