1446/2024-2025

2024 Thlazing thla ni 5: BRN Infrastructures Private Limited (BRNIPL) leh National Highways & Infrastructure Development Corporation Limited (NHIDCL) te'n Young Mizo Association (YMA), Sub-Headquarters, Lungleiin ram leh mipui rawngbawlnaa an hman atana Corporate Social Responsibility (CSR) kal tlanga Mahindra Bolero Camper 4x4 an lei chu vawiin khan Lunglei District Bawrhsap Pu R. Lalṭhazuala chuan Lunglei Sub-Headquarters YMA hruaitute kutah a hlan.

Thilpek inhlanna hun hi Lunglei DC Office tualah buatsaih niin, BRNIPL leh NHIDCL ai awhte leh Lunglei Sub-Headquarters YMA hruaitute an tel a. Bawrhsap Pu R. Lalṭhazuala chuan lirthei chabi leh lehkha pawimawhte chu Sub-Headquarters YMA President Pu K. Lalfakzuala kutah a hlan a ni.

Lunglei District chhunga national highway kawngpui zauh leh siam ṭhat mek enkawltu NHIDCL leh an hnuaia contractor BRN Infrastructures Pvt Ltd te'n CSR aṭanga Lunglei Sub-Headquarters YMA hnena Mahindra Bolero Camper an pek hi ₹ 10,50,601/- man a ni.