4400/2024-2025

Aizawl, the 24th February, 2025: Larsap Gen (Dr) Vijay Kumar Singh, PVSM, AVSM, YSM (Retd) chuan vawiin khan Reserve Bank of India (RBI) buatsaih Financial Literacy Week 2025 chu Mizoram Rural Bank (MRB) Head Office Auditorium, MINECO ah a hawng. Sum leh pai enkawl chunchang inzirtirna lehkhabu (Financial Literacy Booklet), Mizorama library hrang hrang 513 a dah tur a tlangzarh nghal bawk. Kumin Financial Literacy Week thupui atan hian 'Financial Literacy - Women's Prosperity' tih hman a ni.

He hun hmanpuitu Mizoram Larsap Gen (Dr) Vijay Kumar Singh chuan Sawrkar laipui thiltum pawimawh tak, ram intodelha India siam tura hmalakna 'Viksit Bharat -2047' tihlawhtling tura Financial Literacy Week kalpui a ni leh, RBI-in kum tin mi nawlpui thleng pha inzirtirna an buatsaih thin chu lawmawm a tih thu a sawi a. Kumin financial literacy thupui atana inchhung khura pawimawh tak hmeichhiate zirtirna lam hawi thlan a ni chu lawmawm a tih thu sawiin, hmalakna tur thupui thlante hian chhungkaw dinhmun inchen lo tak taka khawsa hmeichhiate chakna leh thiamna a pek ngei ka beisei a ni, a ti bawk. 

Larsap chuan tunlai thiamna sang zelah sum pai enkawl dante pawh technology behchhan a nih tak avangin hei hian kawng hrang hrangah hnathawh a tih awlsam phah thu sawiin, hemi kaltlanga sawrkar laipui scheme hrang hrang Credit Guarantee, Social Security leh Entrepreneurship chungchanga hmalaknate a tarlang a. Mizoram State chhunga Bank leh Financial Institution zawng zawngte chu mipuite'n Bank an dawr vek theih dan turte, Social Security Scheme leh Credit Guarantee system hmang tangkaitu an nih vek theih dan turte ngaihtuaha hma la turin a a chah a. Thuthar thendarhtute pawh financial literacy week hmalaknate puanzar leh mipui zirtir kawnga theihtawp chhuah turin a sawm a ni. 

Thusawitu dang Pu T. Lhungdim, General Manager leh Officer-In-Chage, RBI Aizawl chuan Reserve Bank of India-in kum 2016 atangin kum tin Financial Literacy Week (FLW) a hman thin thu leh kum 10-na hmel a hmuh tak thu sawiin, "He programme hian a tum ber chu campaign chhunga thupui siamte mipui hnena a tam thei ang ber zirtir a ni a ni," a ti a. RBI chuan tunkar chhung hian sum leh pai inzirtirna 'Mass Media Campaign' chu thupui thlan bik hmangin theihtawpin a kalpui dawn thu a sawi bawk.

He hunah hian Pi Pankaja Borah, Officer-In-Charge, NABARD, Mizoram Regional Office; Pu Hubert S.Z. Khobung, Regional Manager, State Bank of India, Mizoram RBO; Pi Sheryl L. Vanchhong, Chaiman, Mizoram Rural Bank leh Pu Lallungmuana, CEO, Mizoram Co-operative Apex Bank Ltd. te pawhin thu benglut tak tak an sawi bawk a. FL week hman a nih avanga lawmthu sawiin, regulator lamin an rawn beisei angin, sum leh pai enkawl chunchang inzirtirna kawngah awmze nei zawk leh tangkai zawka hmalak an tum thute an sawi bawk a ni.

Vawiin vek khan Pu T. Lhungdim, General Manager leh Officer-In-Chage, RBI Aizawl chuan Financial Literacy Van a vailiam bawk a. He Van hian he hun hman chhung hian district panga - Aizawl, Serchhip, Lunglei, Hnahthial leh Saitual ahte a kalkual thin dawn a. FL Week thupui hrang hrangte tarlangin mipuite an kawtkaiah zirtirna a pe dawn a ni.