2397/2025-2026

Aizawl, the 26th November, 2025: India ramin ama puala Danpui duan hman theih tura a pawmna ni pawimawh tak, 'Constitution Day - Samvidhan Diwas' lawmna chu India ram hmun dangte rualin vawiin khan Gauhati High Court, Aizawl Bench-ah hman a ni a. He hun hi Larsap General (Dr) Vijay Kumar Singh, PVSM, AVSM, YSM (Retd) chuan Khuallian niin a telpui a ni.

Larsap General (Dr) Vijay Kumar Singh chuan November ni 29 chu India Danpui hman theih tura pawmna ni a nih mai piah lamah a hlutna, hmathlir tha tak leh tun hun thlenga a la pawimawh zia lantirna hun a ni, a ti a. Kan ram Danpui kaihhruaina hnuaia tun hun thleng thei tura India zinkawng ropui a tih thu sawiin, Gauhati High Court Aizawl Bench chuan Mizoram mipuite dikna leh chanvo humhim turin Danpui hnuaiah mawhphurhna pawimawh tak a neih thu a sawi a. Danpui nung leh mamawh dan a zir zela her danglam theih nei thei tura Dr. B.R Ambedkar kaihhruai Constituent Assembly hmalakna chhuanawm a tih thu sawiin, India hmalam hun tur thui tak ngaihtuah chungin, kan zavai atana tha leh rualkhai taka min phuarkhawmtu - Dikna, Zalenna, Intluktlanna leh Inunauna min pe thei tur Danpui tha tak an siam chhuak a ni, a ti bawk.

Larsap chuan Danpui chu mipui thlan rorelna inghahna bulpui a nih thu leh court rorelna chu Danpui humhimtu a nih thu sawiin, India hmarchhaka cheng hnam hrang hrangte'n dikna leh zalenna an neih theih nana Gauhati High Court sulhnu hrang hrangte fakawm a ti a. Mizorama khawtlang inlungrualna, inrintawkna leh thlamuang taka chenhona chu India Danpui thiltum, ataka lantirna pawimawh tak a nih tih sawiin, Mizo khawtlanga remna, inzahtawnna leh tanrualna chuan Preamble-a inunauna (freternity) zehtel ataka a lantir thu a sawi bawk a. Danpui chu a chhawrtu tur mipuite an hriatthiam chauha thil ti thei a nih thu a sawi bawk.

General (Dr) Vijay Kumar Singh chuan mipuite'n dan an hriat chian nana Legal Aids Clinic hrang hrang kalpui a ni chu lawmawm tiin, zirlai, thalai, hmeichhia, rethei zawkte, thingtlang kilkhawr zawka awmte, rualbanlo leh pawikhawihna tuartute thleng pha uar zawk kalpui turin kalkhawmte a sawm a. Mipui thlan rorelna hunhimtu chu dan zir chianga hemi tlawhchhana hma la ngamte hi an ni, a ti a. India Danpui chuan dikna leh chanvo min pek rualin kan tih ve tur mawhphurhna fundamental duties min pek tel thu sawiin, a pahniha kan kalkawp tir thiam a tul a, ram chakna hnar chu Dan neih tam lamah ni lovin a kenkawh kawnga mipuite inpeknaah a innghat zawk a ni, a ti a. Dan lam khawihtu kalkhawmte chu a ranglama dikna hlen chhuah a nih theih nante, ram zalenna tibuai lova mimal zalenna vawnghim turte, Danpui hlutna thalaite zirtira, intluktlanna kenkawh bakah remna leh inunauna vawnhim kawnga theihtawp chhuah turin a chah a ni.

Justice Marli Vankung, Judge, Gauhati High Court chuan Fundamental Duties tha taka hlen chu mitin mawhphurhna a nih thu leh Fundamental Rights ang thoa pawimawh a nih thu sawiin, dikna leh chanvo lam chauh hriaa mawhphurhna lam ngaihthah chu felhlel a tih thu a sawi a. Kan chanvo leh dikna mai bakah mawhphurhna Danpuiin min pekte kan zawm that phawt chuan kan rama harsatna tam takte kan pumpelh theih dawn thu a sawi bawk.

Justice Kaushik Goswami, Judge, Gauhati High Court-in Preamble pawimawhna sawiin, preamble kentel thil pali - Justice, Liberty, Equality leh Fraternity chu ziaka awm mai lova ataka kalpui a tul thu sawiin, kalkhawmte chu Dan hmanga tanpui ngai leh retheite chhanchhuah tuma tan la turin a chah a. Mipui banphaka Dan rorelna leh dikna chhawp a tul tih sawiin, Court room chu India Danpui tlangnel taka kenkawhna a ni, a ti bawk.

British laka Indiain zalênna a hmuh khan India chuan ama pual Danpui (Constitution) siam tur member 299 awmna, Constituent Assembly a din a. Ni 165 chhungin Constituent Assembly chu vawi 11 a thukhawm hman a. Danpui an duante remkhawm leh siamrem hna thawk turin August 29, 1947 khan Drafting Committee, Dr. B.R. Ambedkar, Father of Indian Constitution tia koh Chairman-na hnuaiah din a ni a. November 26, 1949 a Constituent Assembly thukhawm chuan India Danpui siam chu lungrual takin a pawm ta a. January 26, 1950 khan India Danpui chu hman tan a lo ni ta a ni.

Constitution Day lawmna puala inkhawmah hian Pu Vincent Lalrokima, Member Secretary, Mizom Legal Services Authority chuan kalkhawmte lawmna thu sawiin, Preamble chhiarrual a ni a. Dr. H.T.C Lalrinchhana, Registrar, Gauhati High Court, Aizawl Bench-in lawmthu sawiin hun hman a khar a ni.

Vawiin hun hmanah hian Pi Helen Dawngliani, District & Sessions Judge Aizawl, Pu Ajit Roy, Secretary to the Governor, Pu T.L Guite, Secretary, Law & Judicial Department,  Sawrkar offical dangte leh Dan hremite an tel tha hle a ni.