2398/2025-2026

Siaha, November 26, 2025: Vawiin chawhnu khan Naoatla - I leh Naoatla- II, khua chawmtu tur ni zung chakna hmanga tui lakna (pump) hawnna hun Tourist Lodge, Naoatlaah hman a ni a . PHED Minister Prof. Lalnilawma chuan khuallian niin, tui lakna khawl hi a hawng a, Dr. K. Beichhua, Siaha bialtu MLA chu khualzahawm a ni.

Prof. Lalnilawma chuan kalkhawmte hnena lawmthu sawina a nei hmasa a. Naoatla - I leh II - ten tui thianghlim tha tak an nei tur chu lawmpuiawm a tih thu tarlangin, khawtlangah hmasawnna rah tha a chhuah ngei a beisei tih a sawi . A bik takin PHED - ten theihtawp an chhuah bakah khawtlang mipuite pawhin an tawiawmna zawng zawng fakawm a tih thu a tarlang a. Contractor - Royal Floria, Zarkawt, Aizaw- ten khawtlang mamawh na hriaa, hna tha taka an thawh avang a, hawn hun tura tih hmaa hawn theih a nita chu thil lawmawm tak a ni, a ti. Tui pump khawl leh tui zem enkawl chu khawtlang kutah thui tak a innghat tiin, neitu thinlung pu turin a fuih a. Prof. Lalnilawma chuan WATSAN Commitee - thutkhawm hunah pawh tui bill mumal tak siam a, a thlawn a tui sem mai lo tura chahin, hei hian a chhiat palha siam that kawngah nghawng tha tak a nei ang a ti. Minister chuan tui pump khawl tha tak awm mahse, tui hna a awm lo ang tih a hlauhawm hle tih tarlangin, tui hna humhalh kawngah theihtawp chhuah turin kalkhawmte a chah a ni.

Khuallian chuan tui in tur thianghlim pek kawngah PHED - ten theihtawp an chhuah zel dawn a, mipuite mamawhna chu tha taka hlen zel tum a ni, a ti. Tui pek chungchangah khawl chhiat vang te, pipe chhiat vang leh thil dang avangin tui pek theih loh chang a awm thin a, hemi kawngah hian mipuite nen inhriatthiam tlan a pawimawh hle a ni, a ti. Minister chuan Strawberry leh Naoatla- ten inzawmna tha tak an nei tih sawiin hei hi hmang tangkaia strawberry hmanga an khua vawrh lar tur pawhin a fuih nghal bawk.

Khualzahawm Dr. K. Beichhua, Siaha bialtu MLA pawhin thu sawiin, hriselna turin tui a pawimawh hle a, tui thianghlim tha tak a awm tur chu lawmawm tiin, thianghlimna kawngah hmasawnna a thlen ngei a bei sei tih a tarlang a. Naotla khuaten tui pump khawl leh a dahna tuizem tha tak an nei ta chu lawmpuiin, neitu thinlung pu a, a enkawl kawnga theihtawp chhuah turin a chah nghal a ni.

Pu N. Lalrosanga Bialtu MDC chuan a bual chhunga Tui hnianghnar tak a awm dawn avaning sawrkar leh a bik takin PHED chungah lawmthu a sawi a ni.

Er. Viasai Solo, Sr. EE, PHED chuan technical repot peiin, Vawmtlunglui hnar chu gravity - in kum 2006 khan lak a ni, a ti a. NABARD RIDF XXIX loan hmangin Vawmtlunglui hi a mawngah nizung chakna ( Solar energy) hmanga pump tura ruahman a nih thu a sawi. Hemi atan hian NABARD Loan Rs 4,16,84,000 /- leh State matching share Rs 46,32,000 /- , a vaiin Rs 4,63,16,000 /- hman a nih thu a tarlang a. Contractor hi Royal Floria, Zarkawt, Aizawl an ni a, Solar Plate - 255 dah niin, total installed power chu- 150.45 kWp a ni. Submersible pump hi 100 HP Shakti pump dah a ni a, stanby submersible pump vuah a ni bawk a ti. Ni 20 chhung tui pump enchhinna neih a ni a, mi- 2926 tan tui - 624 litre per minute haw tura duan a nih thu a tarlang bawk. Tui dahna zempui ber hi Litre- 1,20,000 dawng niin, Tuizem awmsa panga (5) tui Litre 7,20,000 dawngah te sem darh leh a ni a,hna zawh hun tura ruahman hi 31.3.2026 a nih laii, ni 10.11.2025- ah zawh fel a ni, a ti.

Vawiin hun hmanna hi Er. Lalropuia, Chief Engineer, PHED- in kaihruaiin,  Naoatla- I,  leh Naoatla- II, mipui thanem tak an tel thei a. Er. Lalsanga, SE, PHED- chuan  lawmthu sawina neiin hun a khar.