2399/2025-2026

Kolasib, November 26, 2025: Vawiin khan Mizoram State Project Monitoring Committee (MSPMC) Vice Chairman Pu R. Lalrinawma hovin Kolasib District-a Sawrkar hmalakna hrang hrang leh hmasawnna ruhrel thawh mekte a hmuna enfiah a ni.

Kolasib District an tlawhnaah hian Vice Chairman Pu R. Lalrinawma chuan, an lo kal chhan ber chu tihdiklohna lai zawng tur ngar ngara kal an nih loh thu a sawi a. Hna tha zawk leh chak zawka thawh a nih theih nana hmalakna te sawiho tura kal an nih thu a sawi. Department hotute, Engineer leh Contractor-te chu an hnathawh kawnga an harsatnate sawilang turin a chah a, sawrkar a thlen ngai a awm pawhin a tul anga an thlensak tur thu a sawi bawk. Amaherawhchu, hna dik leh tlo, a sanction a nih ang taka thawh chu an tihmakmawh a ni, a ti.

SPMC team te hian Thingdawl Agriculture Farm tlawh hmasa berin, hetah hian thawktute nen an hmalaknate an sawiho a. Thingdawlah hian Alu chi dahthatna tur 'Solar Powered Cold Storage' leh Seed Processing Unit-te an tlawh nghal a ni.

Hemi hnu hian I&PR Conference Hall-ah inhmukhawmin, thutawi sawina leh inhmelhriattirna hun hman a ni a. Hetah hian team hnihah inthenin Kolasib chhunga sawrkar hmunhma Project hnathawh mekte tlawh turin an chhuak zui a ni.

Kolasib khaw chhungah hian MSPMC te hian khum 100 lenna District Hospital sak mek te, District Jail thawmthat mek te an tlawh a. Heng bakah hian Project Veng-a Fast Track Court sak mek te, Revenue Staff Quarters Complex sak mek te leh DIC Flatted Factory sak mek te an tlawh bawk a ni. Heng hmunah te hian an hnathawh dante uluk taka enfiahin, Department aiawhte, Contractors leh Engineer-te nen inkawmhona hun tha tak an hmang a ni.

Vawiin hunah hian Vice Chairman hi Er. Lalthanzuala Ralte, Secretary, MSPMC leh MSPMC member dangten an tawiawm a ni.