4162/2025-2026

Aizawl, the 26th January, 2026: India ramin ama pual Ram Danpui (Constitution) a hman tanna ni, Republic Day 2026 chu India ram hmun dangte rualin vawiin khan Mizoram hmun hrang hrangah urhsun taka lawm a ni a. Mizorama Republic Day vawi 77-na lawmna programme pui ber chu tukin dar 9:00 khan Aizawl Lammualah neih niin, Larsap General (Dr) Vijay Kumar Singh, PVSM, AVSM, YSM (Retd) chuan India hnam puanzar pawtpharhin parade contingent te'n hnam puanzar zahna chibai an buk chu a chhanglet a. Hemi hnu hian Republic Day puala thuchah a sawi chhunzawm nghal a ni.

Larsap General (Dr) Vijay Kumar Singh chuan Republic Day vawi 77-na puala Mizo mipuite duhsakna chibai bukin, "Kum 76 kaltaah khan khua leh tuite'n dikna, zalenna leh intluktlanna kan neih theih nan keimahni puala hman tur Danpui kan insiam a, kan ram ropui tak hnuaiah inunauna leh inpumkhatna pawh vawnhim zel kan tum tlat a ni," a ti a. Zalenna kan neih theih nana thahnemngai taka thawktute chu he ni pawimawhah hian hriatreng an nih thu sawiin, Danpuiin a tumte chu a taka tihhlawhtlin a ni em tih erawh enzui a pawimawh thu a sawi bawk.

He hunah hian Larsap chuan tunhnaia Mizoram sawrkar hmalakna leh hlawhtlinna tam tak zinga langsar zualte a tarlang a. Sawrkar flagship programme Bana Kaih hnuaiah progress partner thahnem tak loan pek an nih bakah, CM Special Package Grant hnuaiah progress partner-te fund pek an nih thu sawiin, phase-II kalpui chhoh leh mek niin financial year kal mekah cheng vaibelchhe 350 dah a ni, a ti a. Mizoram tana mellung/historic milestone ni turin Prime Minister-in September ni 13, 2025 ah Bairabi-Sairang railway line a hawn thu sawiin, hei hian nasa takin hmasawnna a thlen dawn a ni, a ti a. May ni 20, 2025 a ziak leh chhiar thiam vekna state hmasa bera Mizoram puan a ni chu chhinchhiahtlak a tih thu a sawi a. Kum kalta chhungin Mizoramah inthlanna hrang hrangte hlawhtling taka neih a nih thu a sawi bawk.

Larsap tarlan dan chuan Dan leh thupek kenkawh kawnga thawktute hmalakna avangin Mizoram chu state ralmuang tak a ni a. Home Department-in Directorate of Prosecution a din a. April 2025 atangin Mizoram Police te'n dan kalha damdawi tawlh ruk cheng vaibelchhe 816, kuhva rah cheng vaibelchhe 17.8 hu leh ralthuam 42 manin, hemi kaihhnawihah hian thubuai 217 ziah luh niin, mi 338 an man a. Excise & Narcotics chuan ruihhlo kg 474 man tlingin mi 611 mana hrem an ni a, Mizoram Liquor (Prohibition) Amendment Act, 2025 leh Mizoram Liquor (Prohibition) Rules, 2025 chu October 2025 ah tih chhuah niin hemi behchhan hian chhiah sawrkar sum bawmah cheng vaibelchhe 1.69 chhun luh a ni tawh.

One Nation One Ration Card atan Scheme for Modernization and Reforms through Technology in Public Distribution System hnuaiah thawktute lak fel niin, 1500 MT leng Kudam Sairangah sak mek a ni a. Online border checkpost module Vairengte leh Kanhmunah hawn a ni a. Khawthlangtuipui-Tuichawng Inland Water Transport Infrastructure sakna tur Sawrkar laipuiin a pawmpui tawh a, district thar 3 ah DTO office hawn fel a ni. Mizoram rawn tlawhtu kum telin an pung chho zel a, nikum October thleng khan Mizoram tlawhtu khualzin tam lamin nuai 4 a tling tawh a, National Tourism Conclave-ah Mizoramim 'Emerging Eco & Nature Retreat Award' a dawng a. PM Ekta Mall, Swadesh Darshan 2.0, PRASHAD leh SASCI scheme hmangin tourism sector tihhmasawn hna thawh mek a zel a ni a. Art & Culture-in mizo hnam ziarang leh nunphung entirna Live Museum a huaihawt chuan ngaihhlut a hlawh hle bawk.

Mipuite hriselna kawngah hmasawnna hrang hrang hmuh niin, Mizoram Universal Health Care Scheme (MUHCS) hnuaiah Sawrkar Damdawiin bakah Mizorama Private Hospital 13, Day Care Centre 3 leh state pawna Private Hospital 25 te an inziaklut tawh a. ZMC&H hnuaia department 8 te'n NQAS Certification ah platinum category dinhmun an thleng a, private cabin khum thar 30, ICU khum thar 13 leh SNCU ah khum 2 dah belh a ni a. Viral Reserch and Diagnostic Laboratory (VRDL) chuan India rama 5-na dinhmun hauhin National Excellence Award a dawng a, Best Practice VRDL atan thlan a ni a. State Cancer Hospital-ah CT Stimulator bun fel niin, November 2025 ah NQAS certification nei thei 94 Mizoramin a nei tling tawh a ni. Ruihhlo ngaite awmze nei zawka enkawl nan sawrkarin Huhliap Short Stay Centre a kalpui mek zel a ni.

Mizoram chu Building & Other Construction Workers Act hnuaia welfare scheme-te social audit ti hmasa ber zing ami a ni a. ITI Aizawlah Data & Artificial Intelligence Lab hawn niin, kum kal mekah mi 400 chuangte'n training an zo tawh a ni. State pual University din nan Mizoram State University Bill 2025 pass tawh niin, academic session leha class tan theih nan Mizoram Engineering College, Pukpuiah post 80 siam a ni a. Samagra Shiksha kaltlangin smart classroom siam nan secondary leh senior secondary school 229 te Interactive Flat Panel pek an ni a, Govt. Comprehensive Middle School, Aizawlah New Age Technology Skills Lab din a ni bawk.

SDG Dashboard leh CSR Matchmaking Portal atan sum hmuh a ni a. Industrial and Investment Policy of Mizoram, 2025 kalpui niin, LCS Zokhwthar chu hawn theiha peihfel a ni a. Central Mine Planning & Design Institute Ltd., Ranchi nena thawkdunin Lunglei District-ah Regional (Promotional) Coal Exploration chu Lunglei District kalpui mek a ni a. Disaster Management Plan tha zawk siam nan Experimental Regional Landslide Early Warning System siam tum a ni bawk. Km 91 a thui kawng laih niin Km 203 a thui tihchangtlun a ni a. Lengpui Airport terminal cheithat hna chu 99.20% zawh fel niin NABARD hnuaiah Thenzawl Solar Power Plant hawn a ni a. Swachh Bharat Mission (Grameen) hnuaiah Individual Household Latrine unit 4,000 leh Community Sanitary Complex 17 siam a ni a. Farkawn WSS (Solar Pumping) leh Niawhtlang WSS te zawhfel a ni bawk a. Minor Irrigation Projects 497 hmangin hectare 20,000 chuang a zauah tuilakna siam a ni.

Chief Minister’s Rubber Mission chak taka kalpui niin, Kuhva Kut chu Rengdil-ah neih a ni a. Ram bung then 50% te chu satellite hmanga thla laka chhinchhiah tawh niin, khaw 319 ah drone survey zawh a ni a. Maumual ramah Land Holding Certificate 530 pek chhuah a ni a. Vantawng Cluster Level Federation chuan Atmanirbhar Sangathan Awards 2024 ah pakhana dinhmun a hauh a. Aizawl Smart City Limited hnuaiah MRI machine leh hmanraw dang 26 te chu Civil Hospital, Aizawla hman tura hlan a ni a. Mizoram Sports Incentive Cash Award kaltlangin sport discipline 15-a a infiammi 218 leh official te hnenah cheng nuai 94 sem a ni a. Empowering Mizoram Sports (EMS) program hnuaiah olympics tinzawna hmalak a ni.

Secretariat office 42 leh Directorate office 25 ahte e-Office project kalpui a ni a. Mizoramah cooperative society inziaklut 1,550 awm mekin PACS-te computer hmanga thuam vek tum a ni a. District tina khaw pakhat zelah Digital Crop Survey kalpui niin, oil palm 5600 MT thar chhuah a ni a. National Bamboo Mission hnuaiah Bamboo Processing Unit din a ni tawh a. Artuia intodelh turin modern poultry layer farm din tuma hmalak mek niin, sangha tonne 15 vawnthat theihna cold storage facility chu Ngaizelah hawn a ni bawk.

Kumin Republic Day-ah hian Police, Fire & Emergency Services leh Mizoram Home Guard & Civil Defence hnathawk tha leh khawpui fai intihsiakna lawmman a hnuaia tarlante hnenah Larsap-in chawimawina a hlan a ni.

A) President's Police Medal for Distinguished Service (Independence Day 2025-a puante) 

Pu Lalringdika, Commandant, 3rd Bn MAP

B) Police Medal for Meritorious Service (Independence Day 2025-a puante)

1) Pu Stephen Lalrinawma, Sr. SP, Traffic
2) Pu TC Zothansanga, Inspector, 3rd Bn MAP
3) Pu Laldanzira, Fire Fighter
4) Pu Lalhmangaiha Colney, Fire Fighter
5) R. Pachhunga, Company Sergeant Major
6) J. Laldenga, Company Sergeant Major

C) Governor's Gold Medal:-
1) SI C. Vanlalruata, CID (SB)
2) SI Lalrinpuii Pachuau, Aizawl DEF
3) SI T. Lalthianghlima, Champhai DEF
4) ASI Lalrinngheta, Saitual DEF
5) Naik F. Lalmuankima, 1st Bn. MAP
6) Const. Zorama, 2nd IR Bn.
7) Const. Lalchhuanliana, Champhai DEF

D) Governor's Silver Medal:-
1) Inspr. Lucy Zosangzuali, Security Unit
2) Inspr. Lalrinmawia Colney, Security Unit
3) SI Zoensanga, Aizawl DEF
4) ASI H. Lalpekhlua, Saitual DEF
5) Const. Joseph L. Hmar, CID (SB)

Khawpui fai intihsiakna lawmman hetiang hian sem chhuah a ni bawk.

A) Urban Towns category:
1. Ngopa
2. Biate
3. Tlanbung

B) District Headquarters category:
1. Siaha
2. Saitual
3. Khawzawl

Vawiin Republic Day vawi 77-na lawmna hunah hian parade contingent 24; Armed Contingent 6, Unarmed Contingent 6, School Contingent 12 bakah Band party 3 an tel a. Parade Commander Pi Jessica Lallawmzuali, Dy. SP (Legal) leh Second Commander Pu Alfred Lalrinchhana, Dy. SP (Crime) te'n parade contingent-te an kaihruai a ni.

Larsap General (Dr) Vijay Kumar Singh chuan parade contingent zinga lam thiam zual thlanchhuahte hnenah lawmman a hlan a. Armed Category-ah 34 Assam Rifles, 1st Bn MAP leh 5th IR Bn te chuan parade thiam lawmman pakhatna, pahnihna leh pathumna an la a. Unarmed Category-ah Ex-Servicemen, 20 Mizo Bn NCC leh Govt. Chanmari Model Middle School Scouts & Guides te chuan parade thiam lawmman pakhatna, pahnihna leh pathumna lain, School contingent zingah St. Paul's HSS, Govt. Mizo High School leh PES Republic Veng te chuan parade thiam lawmman pakhatna, pahnihna leh pathumna an la bawk.

Aizawl Lammuala Republic Day 2026 lawmna inkhawm neih zawh hian Larsap chuan Circular Lawn, Lok Bhavan-ah sawrkar hotulute leh sawm bikte pualin 'At Home' programme a buatsaih a ni.

Larsap thusawi kimchang : https://dipr.mizoram.gov.in/post/republic-day-vawi-77-na-lammual-aizawla-mizoram-larsap-gen-dr-vijay-kumar-singh-pvsm-avsm-ysm-retd-thusawi