Mizoram khua leh tui duhtak te u, 

Vawiin Republic Day vawi 77-na hun hlimawm leh chhinchhiahtlak takah hian chibai ka buk vek a che u. Kum 76 kal ta, vawiin angah khan keini, India mipuite chuan khua leh tui zawng zawngin dikna, zalenna leh intluktlanna kan lo neih theih nan Ram Danpui kan hmang tan a. Kan ram ropui tak inlungrualna leh inpumkhatna chawikang turin urhsun takin kan intiam bawk. Kan Ram Danpui – dikna chanvo nemnghehna thuziak leh kan chet dan kaihhruaina ruhrel – hi kan vaia kan chhuan leh chhawmnun zel tur a ni.

He kan thil rochun chhuanawm tak hriatrengna hun kan hmana chhawmnung tura kan intiam nawn mek lai hian Danpuiin a tumte a taka kalpui dan kan enlet pawh a ngai a ni. Dikna, intluktlanna leh rualkhai taka thanna te hmangin kan ram hian kawng hrang hrangah hma a sawn a. Kan ramin hma hun hlawhtling leh ngelnghet a neih theih nana hmasawnna, hlawhtlinna leh hmalakna thenkhat in hnena hriattirna hun atan ka han hmang ang e.

Ka Sorkar flagship programme, Mizoram Bana Kaih (Hand Holding) Scheme-in sum, thiamna, hmasawnna ruhrel leh tanpuina dangte kaltlanga hma a lakna chuan Phase-II a lo thleng ta der mai. Progress Partner tam takin loan component hnuaiah tanpuina an dawng tawh a, Chief Minister’s Special Package Grant hnuaiah pawh sum sem a ni tawh a. Financial Year 2025-26 atan budget cheng vaibelchhe 350 dah a ni.

Chief Minister’s Bana Kaih Innovation Challenge pawh siam a ni a. Hei hian state, district, block leh village level-a hmasawnna kalhmang siam kawnga thuk zawka mipui an tel a, ruahmanna tha tak takte hai chhuaka, hmasawnna rualkhai zawk a awm theih nan he Innovation Challenge hi buatsaih a ni.

Nikum khan State Election Commission chuan kan State chhunga mipui thlan rorelna vawnhim nan inthlan pawimawh tak tak a buatsaih a. Chu’ngte chu Mara Autonomous District Council hnuaia Village Council sawmpathuma By-Election; Chakma Autonomous District Council hnuaia Kamalanagar Member of District Council thlanna By-Election; Aizawl Municipal Corporation area chhunga Phunchawng Local Council-a By-Election bakah Lai Autonomous District Council General Election te a ni.

He’ng bakah hian Mamit District-a Dampa (ST) Assembly Constituency By-Election pawh boruak ralmuang tak hnuaiah hlawhtling taka kalpui a ni a. He’ng inthlannate hi dik tak leh langtlang thei ang berin, voter-te huap zo tur leh mipui thlan Sorkar rorelna fel taka a kal theih nan huaihawt a ni.

Kum 2025-26 chhung hian kan ramah ralmuang takin dan leh thupek kalpui a ni a. Mizoram Police-in an hna thatho taka an thawh avang leh an vil uluk em avangin buaina liantham engmah a thleng lo a. Mizoram Police-te hian state thenawmte nena kan inrinaa buaina chhuak thei dan nan thahnemngai takin an thawk a, he’ng hmunahte hian venghimtu sipai an indah a ni. Hei bakah hian ram hmelmate chet theihna tur laka ram thenawmte nena kan inrina humhim turin Mizoram Police leh Border Guarding Force-te chuan Assam Rifles leh BSF-te ang bawkin ramriah fragment patrolling an kalpui thin a ni. Home Department chuan Directorate of Prosecution a din fel tawh bawk.

April 2025 atanga he thu buatsaih a nih thleng khan Mizoram Police chuan ruihhlo do kawngah nasa zawka beihpui an thlak avangin cheng vaibelchhe 816 vel hu ruihhlo manin, thubuai 217 siamin, mi 338 an man a. Dan kalha bungraw tawlh ruk dona kawngah pawh theihtawp chhuah niin kuhva tawlh ruk cheng vaibelchhe 17.8 hu leh a inhnamhnawihte an man a. Dan lova zu zawrh pawh na taka do niin, rakzu, Indian Made Foreign Liquor, ram dang siamchhuah zu leh beer thahnem tak man a ni a, thubuai 82 ziah luh niin, mi 99 man an ni. Hemi hun chhung vek hian Mizoram Police chuan silai 42, a mu tam tham tak leh a neitute manin, thubuai an siamsak a. He’ng bakah hian cheng 500 note lem thahnem tak man niin, a neitute dan anga hrem an ni bawk. He’ng an chetnate hian ram rorelna felfai a awm theih nan te, dan palzut tura intelkhawmna khuahkhirh a nih theih nan te, leh mipuite sahim nana Police-te inpekna nasat zia a tilang a ni.

Kum 2025-26 chhung hian Excise & Narcotics Department chuan ruihhlo hmanga sumdawnna dona kawngah khauh takin hma a la a, dan bawhchhia mi 611 mana hrem an ni a, ruihhlo kg 474 dawn lai man niin, ganja chinna hmunte tihchhiat a ni bawk. October 2025 khan Mizoram Liquor (Prohibition) Amendment Act, 2025 leh Mizoram Liquor (Prohibition) Rules, 2025 chu chhawp chhuah niin, hei hian dan lova zu zawrh do kawngah thawktute tha a tichak sawt dawn a ni. He Dan hi khauh taka hman niin, hemi tlawhchhan hian mi 4000 chuang man tawh niin, thubuai tam tak ziah luh a ni bawk. He’ng hmalaknate avang hian chhiah cheng vaibelchhe 1.69 aia tam Sorkarah chhun luh a ni a. Hei hian zu leh ruihhlo do kawngah leh mipuite hriselna leh rorelna felfai kalpuina kawngah Sorkar a tang na hle tih a entir a ni.

Scheme for Modernization and Reforms through Technology in Public Distribution System (SMART-PDS) kaltlangin tunlai thiamnate chhawr tangkaia Public Distribution System (PDS) siam that tum a ni a. Hmalak tawhnaa duhkhawp lohna awmte sukianga, IMPDS hnuaia hmathar lakna chak zawk  hmang leh, One Nation One Ration Card (ONORC) hmalakna tichak zel chunga hmasawnna thlen tum a ni a. Mizoram State e-Governance Society (MSe-GS) kaltlangin SMART-PDS hnuaia State Project Implementation Team (SPIT) a thawktu tur tluang taka lak fel a ni a. Thiamna chhuak thar  zel thlir chungin, SMART-PDS portal tha taka  kalpui a nih theih nan Command and Control Centre (CCC) din a ni bawk.

FCS&CA Department chuan 1500 MT len theihna kudam Sairang-ah a sa mek a. Mizoram chhunga supply kudam zawng zawnga hman tur Digital Weighing Scale lei a ni a, hei hian buhfai hralh kawngah bukna diklo leh mihring tihsual palh awm theite vengin, Sorkar langtlang leh rintlak siamna kawnga hmanraw pawimawh tak a ni.

Mizoram tana mellung pawimawh tak, Bairabi-Sairang rel kawng thar chu India Prime Minister zahawm tak Pu Narendra Modi chuan September 13, 2025 khan a hawng a. Mizoram khawpui, Aizawl kawtkaia rel rawn lut hmasa ber niin, rahbi thar min chuankai tirtu pawimawh tak a ni a. Aizawl thleng rel rawn lut hian zin hunchhung a ti tawi a, bungraw lakluh man a ti tlawm a, sumdawnna, khualzin hip leh eizawnna lamah kawng nasa takin a hawng dawn a ni.

Transport Department chuan Border Check Post pahnih, Vairengte leh Kanhmun a hman tur Online Border Check Post Module a hawng a. CHECKPOST portal hi Check-post kaihhnawih service hrang hrang mipuiten awlsam zawka an hman tangkai theihna tura ruahman a ni. He portal hi state dang atanga lo lut lirthei chhiah online-a pekna atan hman tan phawt a ni ang.

Ministry of Ports, Shipping and Waterways chuan Lunglei District chhunga Khawthlangtuipui leh Tuichawng inkalpawhna tur Inland Water Transport Infrastructure sa turin phalna min pe tawh a. Mipuite tan transport kaihnawih service hrang hrang banphaka a awm theih nan Khawzawl, Saitual leh Hnahthial-ahte District Transport Office thar hawn a ni a. Hei hi transport department inrelbawlna leh hnathawhte semzai kawnga hmalakna pawimawh tak a ni.

Kum 2024-2025 chhung khan Mizoramah khualzin nuai 5 chuang rawn lut anga chhinchhiah niin, khualzin rawn lut hi 139.5% in a pung a, kum 2025-2026 ah pawh hian pun belh zelin October 2025 thleng khan khualzin nuai 4 chhinchhiah tawh a ni. Mizoram chu hmarchhak state zinga tourism-a thang duang ber pawl a ni. Sairang thleng rel rawn lut hian zin veivah a ti awlsamin, khualzin pawh an rawn luh hnem phah hle a ni.

Tourism Department chuan kan rama tourism thang zel thuamchak turin hmasawnna ruhrel chi hrang hrang - PM Ekta Mall lungphum phum te, Swadesh Darshan 2.0, PRASHAD leh SASCI hnuaia project hrang hrangte bakah, Keilungliah Eco-Resort Experience, Champhai; Cultural & Heritage Centre, Champhai;  Vangchhia tihchangtlun hna, Vantawng View Aerial Ropeway project leh Thingsulthliah-a Convention Centre sak hnate a kalpui mek a ni.

Tourism industry thang meka a hlawkna teltu an nih ve theih nan khawtlang mipuite, village council leh tourism kaihhnawih hna thawktute tan Community-based Tourism kaihhnawih inzirtirna programme-te buatsaih a ni a. Kan hnam ziarang, kan buh leh thlai tharchhuah te, adventure leh hun pawimawh hrang hrang kan neihte behchhanin Tourism Department chuan kut kan hman thin te bakah a dang te a siam belh a, intihsiakna hrang hrangte buatsaihin, khualzin tam zawk hip lut turin hma a la zel a ni. Heng hmalakna tha tak takte avang hian Toursim Department chuan national-level tourism conclave-ah ‘Emerging Eco & Nature Retreat Award’ a dawng nghe nghe a ni.

Art & Culture Department bultumin Zokhua, Falkawnah pipute khawsak dan leh nunphung pholanna Live Museum buatsaih a ni a. Hei hian tualchhung mite leh thalaite tana sum lakluhna hnar a siam a, zinmite’n Mizo kutchhuak an hmuha an lei theih mai bakah Mizo nihna leh hnam ziarang chawilar nan a pawimawh em em a ni.

Ka Sorkar chuan hriselna tihchangtlung kawngah nasa takin tan a la a, damloh nikhuaa inenkawl a awlsam nan damdawiin, health centre leh dispensary-te hmalakna zauh niin mipui ban phaka chhawp hnai a ni a. Hmalakna tha taka a kalpui avangin Zoram Medical College & Hospital hnuaia department 8 chuan NQAS national certification hmuin ngaihhlut hlawh tak Platinum category dinhmun a luah pha a. MusQan (naupang hriselna tehna) leh LaQshya (nu leh naute enkawlna tehna) hnuaiah quality certificate an hmu bawk a. Private Cabin khum thar 30, ICU khum thar 13 leh SNCU-ah khum thar 2 neih belh a ni a. Department of Microbiology hnuaia Viral Research and Diagnostic Laboratory (VRDL) chuan ‘National Excellence Award’ dawngin India ram pumah 5-na a ni a. Department of Health Research (DHR), Ministry of Health & Family Welfare Department buatsaih National VRDL Conclave 2025, New Delhi-ah ‘Best Practices VRDL’ lawmman a dawng bawk a ni.

Health & Family Welfare Department chuan Mizoram chhung leh pawna empanelled hospital-ah man chawi lova mipuite an inenkawl theihna tur Mizoram Universal Health Care Scheme (MUHCS) a duang a. Mizoram chhunga Sorkar hospital zawng zawng, private hospital 13, Day Care Centre 3 leh Mizoram pawna private hospital 25-ten he scheme hi an zawm tawh a ni.

Mizoram State Cancer Institute, Zemabawk-ah CT Stimulator bun a ni a. Mizoram chuan NQAS certification lamah nasa takin hma a sawn a – December 2023-ah damdawiin leh a kaihnawih hmunhma 5 (1.31%) chauh certified niin, November 2025-ah chuan hmun 94 (26.20%) laiin certificate an hmu tawh a ni.

Ka Sorkar chuan ruihhlo hman khawloh leh ruihhlo-in khawtlanga nghawng tha lo tak tak a thlente a ngaihven em em a. Ruihhlo hian a hmang khawlotute tan mai nilo, chhungkua leh khawtlang thlengin harsatna tam tak a thlen a. Social Welfare, Women & Child Development Department hmalaknain Synod Rescue Centre, Neihbawiah ruihhlo ngaite enkawlna tur Hulhliap Short Stay Centre buatsaih a ni a. He centre hi ruihhlo ngaiten nun thar an neih theih nana taksa leh hriselna tihthatna mai bakah rilru leh thlarau lam thlenga intihchakna hmun a ni.

LESDE Department leh Mizoram State e-Governance Society tangkawpin thalaite tana awlsam zawka hna zawnna tur digital platform EmpEx Employment Exchange Portal chu hawn a ni a. He portal-ah hian thalai hna zawng mek 20,000 chuang inziaklut tawhin, Sorkar, private leh public sector-a hnaruak awm pawh a pung zel a ni.

Mizoram chu India rama state dangte zingah pawh Building & Other Construction Workers Act hnuaia Social Welfare Scheme hrang hrangte, hlawhtling taka social audit nei thei state hmasa berte zinga mi a ni bawk a. Hei hian Sorkar leh mipuite inpekna bakah langtlang taka hna thawh thin a nihzia a tarlang bawk a ni.

Skill development lamah pawh hmasawnna a awm theih nan Mizoram Sorkar, ITI leh Industry liante thlunzawm niin, tunlai thiamna leh hmanraw tha ber berte hmangin, thalaite tan training kapui mek zel a ni bawk a. SASCI scheme kaltlangin ITI Infrastructure-te pawh tih changtlun zel niin tunlai khawvel thiamna, computer kaihhnawih thil, Data leh Artificial Intelligence Laboratory-te pawh la din zel tura hmalak mek a ni bawk. Kum khat chhungin mi 400 chuangin ITI course an zir zova, chung zinga engemawzat chuan hmun hrang hrangah eizawnna hna tha tak tak an hmu tawh bawk a, hengte hian skill development lama Sorkar hmalakna ten rah duhawm tak a chhuah mek zel a ni tih a tilang awm e.

Mizoram Youth Commission-in training, career guidance leh kawng hrang hrang hmangin thalaite thuamchak hna an thawk reng bawk a. Hotel management, spa therapy, technical lam thil leh tunlai mil zirna chi hrang hrang an kalpui thinte kaltlangin Mizo thalai eng emaw zat chuan India rama hotel leh company hriat hlawh tak takahte hna an hmu tawh a ni.

Kum kalta chhung khan Higher & Technical Education Department lamah pawh hmasawnna langsar tak awmin, Mizoram State University Bill 2025 pawh pass a ni tawh bawk a. Mizoram State University dinna tur leh, zirlai tam tak, a bikin mi harsa zawkte pawhin ram dang pan buai ngai lova mahni ram chhung ngeia zirna changtlung zawk an neih theih nan zirna in tha leh remchanna siam sak zel hi Sorkar chuan a tum a ni. Pukpui-ah Mizoram Engineering College din fel thuai a nih theih nan chak taka hmalak mek zel a ni bawk a, kum 2026 - 2027 academic session atanga zirna kalpui tan theih beisei a ni a. Hemi atan hian post hrang hrang 80 siam tawh a ni.

School Education Department ten huapzo taka zirna kalpui a nih theih nan leh quality education (zirna tha leh changtlung) a awm theih nan hma an la reng bawk a. National Education Policy zulzuiin national level-a inkaihhruainate leh mizoram nunphung nena inmil siin, zirna kalpui hna an thawk reng bawk.

Samagra Shiksha hnuaiah zirlaite thiamna leh theihna tih hmasawnna tur programme hrang hrang - Vidyanjali-school volunteer programme, zirna kailawn (Vidya Pravesh), Kala Utsav, Rangotsav leh Rashtriya Avishkar Abhiyan te kalpui niin Secondary school 229-ah Interactive Flat Panel, smart classroom hawn a ni tawh bawk a. Heng bakah hian Directorate of School Education chuan Govt. Comprehensive Model School, Aizawl-ah New Age Technology Skills Lab dinin, Infrastructure tih changtlunna lam te, puitlingte tana lehkha zirna tur te, PM Poshan hnuaia chawchhun siamte thlenga kalpuiin zirna huapzo a awm theih nan leh zirlaite hmasawn zelna turin hma an la reng bawk a. May 20, 2025-a (ziak leh chhiar thiam vekna state hmasa ber) First Fully Literate State-a Mizoram puan a han ni te khan zirtirtute, zirlaite leh mipuite inkarah thawhhona tha tak a awm a ni tih a tarlang bawk a ni.

State Council of Educational Research and Training chuan class I - IV te hman tur SCERT Text book thar an buatsaih a, capacity building programme - EduTech Fest leh Career Fair 2025 te buatsaih bawkin mit khawhmuh fiah lote tan SAKSHAM Branch hnuaiah Digital Learning Lab an din bawk. SCERT hi state-a Elementary Education lama thuneitu niin Rehabilitation Council of India for B.Ed Special Education chuan kum 2027-2028 thlenga Centre of Excellence-ah a puang a ni.

Mizoram Board of School Education chuan zirlaite tan exam felfai takin an buatsaih thin a exam centre thar panga hawn belh niin, UPSC Grooming Scheme hnuaia zirlai thlan chhuahnaah pawh a tangkai hle bawk. Hetih rual hian Mizo Language Development Board chuan thahnemngai takin seminar leh intihsiaknate hmangin Mizo tawng leh thu ziakte chawi lar hna an lo thawk ve reng bawk a; Indian Constitution 8^th Schedule-a  mizo tawng telh a nih ve theihna turin, zir chiang tur pawl study group pawh an din nghe nghe. Digitial India Bhashini Division-te nen AI-based language model hmanga Mizo tawng leh hnam dang tawng hrang hrang hmangte, awlsam zawka inbiak pawh zung zung theihna turin, thawhhona thuthlung MoU pawh ziah fel a ni tawh bawk.

Department of Personnel & Administrative Reform hnuaiah Civil Services thawm chakna turin Capacity Building Commission, Karmayogi Bharat (SPV) leh Mizoram Sorkar chuan thawhhona thuthlung MoU an ziak tawh a. He thawhhonain a tum ber chu ram leh mipuite tana thawktu civil servant-te, iGOT training platform kaltlanga an thiamna leh theihnate tuaihriam a, khawl leh tunlai thiamna thil chi hrang hrang lo chhuak thar apiangte pawh, ram leh mipuite rawngbawlna atana an hman thiam ve zel theihna tur leh hlawk zawka hna an thawh theihna tur atana tuaihriam reng hi a ni.

Planning & Programme Implementation Department chuan Mizoram SDG Dashboard leh CSR Matchmaking Portal siam a nih theih nan hma an la a, UNDP nen thawk dunin hemi atana sum mamawh tur pawh pawm a ni tawh nghe nghe a ni. He dashboard hi SDG kaihhnawih data dahkhawmna tur niin, thingtlang khaw hrang hrang leh khawpui dinhmun te, hmasawnna hrang hrangte awlsam taka en mai theih a ni dawn a, chu chuan hmasawn zelna atan inelna thianghlim buatsaihin, Sustainable Development Goal leh target-te hlenchhuah kawngah pawh nasa takin Mizoram khuate a pui dawn a ni.

Industry lamah pawh hma kan sawn theih nan Commerce & Industry Department-in 'Industrial and Investment Policy of Mizoram 2025' a duang chhuak tawh bawk a. He policy hmang hian Industry-a Mizoram kan hniamna lai te, hmasawn kan ngaihna laite leh insiamthatna turte chhuichhuah niin, Mizoram Industry pawhin hmasawnna kawng a zawh thei dawn a ni. IGC Luangmual (Aizawl), IIDC Pukpui (Lunglei), IIDC Zote (Champhai) leh DIG Complex (Kolasib) ahte hian Flatted Factory Complexes sak mek a ni bawk a. Hengte hi entrepreneur-te mamawh leh duh zawng tih theihna tur basic facilities leh Infrastructure awmna hmun pawimawh tak niin, sak zawh a nih hunah chuan Mizoram MSME ecosystem pawhin nasa takin hma a sawn phah thei dawn a ni. Indo - Myanmar ramri-a insumdawntawnna a that lehzual theih nana LCS, Zokhawthar Infrastructure Development project pawh thawh zawh ni tawhin, hawn mai theihin a awm tawh bawk a ni.

Lungalhthei laih chhuah hna (coal exploration) Rotlang West Block, Lungleiah thawh mek a ni bawk a. Hemi atan hian Ministry of Coal chuan Central Sector Scheme kaltlangin sum mamawh leh senso ngai zawng zawng an tum vek a, Central Mine Planning & Design Institute (CMPDI) Ltd., nen tanghoin he Coal Exploration hna hi thawh mek a ni.

Mizoram hi chhiatrupna thlen theihna, Disaster prone-state a nih angin Sorkar chuan chhiatna a lo thlen thulh pawha kan tuar lutuk lohna turin - planning & monitoring te, training programme hrang hrang leh mock drill-te hmangin hma a la reng a. Directorate of Disaster Management & Rehabilitation leh Geological Survey of India chuan leimin avanga chhiatna thleng thinte laka inven nan 'Experimental Regional Landslide Early Warning System' Mizorama hman a nih theihna turin thawhhona thuthlung an ziak tawh a. He thawhhona kaltlang hian leimin thleng theite inhriattir zung zung niin, thu pawimawhte inhrilhhriat zung zung theih a ni dawn a, Landslide Disaster Plan pawh felfai leh tha zawka duan theih a ni dawn a ni.

Kawngpui tha neih hi ka Sorkarin a ngaih pawimawh berte zinga pakhat a ni a. Nikum chhung khan PWD hmalaknain Km 203.106 a thui kawng blacktop a ni a, km 91.630 a thui kawng siam nan lei laih a ni bawk a, km 75.916 a thui concrete road siam ni bawkin tui luan kawr pawh 496 siam a ni bawk a. Lei luangral zel leh chhan hrang hrang dangte avanga kawng chhe tur venna atan protection work Running Metre 10623.10 a thui siam a ni bawk. Lengpui Airport thawmthat hna pawh 99.9% thawh zawh tawh niin, Aiport panna kawngpui pawh 100% siam zawh a ni tawh bawk.

Kawlphetha hnianghnar zawk a awm theih nan P&E department chuan nasa takin hma an la a. NESIDS-OTRI hnuaiah Chite, Aizawl-ah Sub-Station thar bun niin hei hian Aizawl chhuah lam vengte tan kawlphetha indaihlohna awm thinte a phuhru thei tawh dawn a; hei bakah hian NABARD sum hmanga din Thenzawl Solar Power Plant pawh December ni 20 khan hawn a ni.

PHE Department chuan tui thianghlim hnianghnar zawk kan neih theih nan nasa takin hma a la bawk a. Faina leh thianghlimna lamah pawh Swatch Bharat Mission (Grameen) hnuaiah - mimal inthiarna (Individual Household Latrines) 4000 bakah, vantlang inthiarna (Community Sanitary Complex) 17 an sa thar bawk a ni.

Farkawn leh Niawhtlang I&II ahte nizung chakna hmanga tui lakna, Solar Pumping Water Supply Scheme zawh fel a ni tawh a. Aizawl hmarlama awm ten tui hnianghnar zawk an hmuh theih nan Division thar, 'Aizawl Water Transmission North Division' siam thar ni bawkin, hemi division hnuaiah hian sub-division 2 siam thar a ni bawk. Heng bakah hian Sub-Division 3, Champhai WATSAN Division hnuaiah Hnahlan WATSAN Sub-Division; Aizawl Water Transmission North Division hnuaiah Power Sub-Division thar leh Sewerage & Drainage Division hnuaiah Aizawl East- II Sub-Division-te siam thar a ni bawk a ni.

Irrigation & Water Supply Department hmalaknain, Mizorama tui awmte tangkai taka hman dan tur ruahmanna thar tam tak siam a ni a, hemi hnuaiah hian  hectare 20,000 huam chhungah irrigation project 497 siam a nih tawh bakah, tuilian laka inralrin theihna tur, Mizorama a hmasa ber atan Early Flood Warning System chu Tlawng luiin a paltlang hmun hrang hrang, tui len mai hlauhawm theihna ni a ngaihahte bun fel tawh a ni a. Heng bakah hian tui leh a kaihhnawih inkaihhruaina chi hrang hrangte digital-a kalpui zung zung a nih theih nan Mizoram State Water Informatics Centre chu din a ni bawk.

Kum 2025-26 chhung hian  Land Resources, Soil & Water Conservation Department chuan Chief Minister’s Rubber Mission leh a kaihhnawih scheme hrang hrangte kaltlangin, rubber chinna hmun zau zawk ruahman te, zokhaw lama hmasawnna ruhrel changtlung zawk din te leh District hrang hrang huam chhunga kuthnathawktute eizawnna ngelnghet zawk ruahman sakin hma nasa takin a la a. NABARD leh Bana Kaih hnuaiahte rubber chinna hmun hrang hrang siam belh niin, a kalna pawhna tur fur leh thal dawl zo kawngpuite siam a ni.

Rubber leh kuhva chingtute tan, a seng leh hralh chhuah thlenga a awlsam beiseiin link road-te siam a ni a. LRS&WC Department vek hian kuhva huan awm sa angte chu a hlutna belh chhah tur leh hralhchhuah kawnga tanpui turin, district-level complex-te a din bawk a. Heng hmalaknaahte hian a taka thawktute zirtir chu a pawimawh ber tih hriain, rubber chingtute tan changtlung zawka rubber chin dan leh seng hnua sawngbawl zui zel dante thlengin inhrilhhriatna neih thin niin, Bana Kaih Scheme hnuaia thlan chhuah progress partner-te chu special package leh credit-linked scheme hnuaiahte thlai hrang hrang hlawk zawka chin pawlh dan te zirtir an ni bawk a. Heng hmalaknate hi a hlawhtlinzia lanna pakhat chu kum kal taa Rengdil khuaa Kuhva Kut (Arecanut Festival) kha a ni awm e. He kutah hian Sorkarin a tum tak Agriculture huanga ‘Value Addition’ hlawhtlinzia rawn lang chhuakin, tualchhung mite chuan an kutchhuak thil chi hrang hrangte an rawn pho chhuak a nih kha.

Land Revenue & Settlement Department hnuaiah, Mizorama ram bung then (land parcel) zaa sawmngate chu felfai taka Satellite hmanga thla laka chhinchhiah (geo-referenced) ni tawhin, ram bung then dangte pawh chhinchhiah zel turin ruahmanna siam a ni. Khaw hrang hrang 319-te chu Drone hmanga thla lak niin, hengah te hian mipuite zirtirna IEC kalpui nghal zel a ni bawk a. Drone hmanga enfiah tawh zing atanga khaw 305 ah leilung chhinchhiahna felfai tak (ground truthing) kalpui a ni tawh a ni.

Mizoram chu India ram hmar chhak state zinga Property Card pe chhuak hmasa ber niin, tunah hian  ram neitu mi 4041 hnenah   Property Card sem chhuah tawh a ni.

Khawpui chhung in hmun lo ramte felfai taka chhinchhiah dan thar National Geo-spatial Knowledge-based Land Survey of Urban Habitations (NAKSHA) chu kalpui chhoh mek niin, Mizoramah hian Aizawl Municipal Ward 11-19 chu enchhinna atan hman a ni a. Henga hman tur hian DoLR  bultumin ROVER 24 lai  lei belh niin; heng rover-te leh MPSEDCv buatsaih NAKSHA portal-te hmanga Portal-te tihfel a niha, URPRO nen felfai taka siam rem  theih a nih hunah  ground truthing/field survey chu chhunzawm tum a ni bawk a. November ni 11, 2025 khan, Maumual, Chaltlang ramah Land Holding Certificate 530 pek chhuah a ni.

Rural Development & Administration Department chuan lui lian zualte chheh vel tuihnate siam thar lehna (state-wide mega-rejuvenation of springs) kalpuiin, North East Initiative Development Agency (NEIDA) nen thawhdunna thuthlung an ziak a. ‘Project Tuihna - Damkhawchhuahna’ chu chak taka kalpui mek a ni.

Sawrkar kum kal mek 2025-26 chhung hian MZSRLM hmalaknain, Self-Help Groups (SHGs) awm sa 10,148 bakah State chhunga RD Block 28-a chhungkaw 1791 awmna Self-Help Groups thar 214 zet a din belh a. Serchhip RD Block hnuaia Vantawng Cluster Level Federation chuan Atmanirbhar Sangathan Awards 2024-ah India ram puma pakhatna dinhmun an hauh thei a. He chawimawina hi Sorkar laipui Ministry of Rural Development-in Cluster Level Federation kum nga la tling lo, mahni kutkea ding theite chawimawina a pek thin a ni.

Sorkar chuan  khawpui chhung inrelbawldan belhchian dawl hi ram hmasawnna atana thil pawimawh ber pakhat a ni tih leh hemi atana khawtlang mipuite nena tanrualna pawimawhzia a hre reng a. Urban Development and Poverty Alleviation Department chuan khawpui chhunga bawlhhlawhte mumal taka sawngbawl a nih theih nan kawng hrang hrangin hma a la a. Khawpuia cheng mi harsa zawkte dinhmun hre reng chungin Sorkar chuan Thakthing vengah Reduce, Reuse, Reuse (3R) Multi-Utility Centre a din a ni.

Nikum World Environment Day khan mahni puala bawlhhlawh bawm enkawl tura inpek ‘Adopt-a-Dustbin’ scheme chu kalpui tan a ni a. He hmalakna hian khawpui vawn fai hi mipui vantlang mawhphurhna a nihzia tarlan chu thupuiah neiin, tunah hian Aizawl khawpui chhung hmun hrang hrang 75-ah bawlhhlawh bawm 95 enkawl (adopt) tawh a ni.

Mipui vantlang tana hmasawnna ruhrel tha din hi Sorkar mawhpurhna pawimawh ber pakhat a ni tih hre rengin kan khawtlang nun hmasawn zawkna tur leh kan mamawhte phuhru leh zual turin Aizawl Smart City hnuaiah nasa takin hmalak a ni a. MRI machine tha tak leh damlote enkawlna tur hmanraw pawimawh tak tak 26 lai Civil Hospital, Aizawl-ah hman theih tura bun fel tawh a ni a.

Infiamna lamah pawh kawng hrang hranga hmalak zel niin, khawvel pum huap pawha zahpuiawm lo tur Football Ground chu Chite-ah sak zawh tawh niin tangkai taka hman a ni tawh a. Hei bakah hian MINECO-ah mipui vantlangin an hlut tur Urban Landscape project  kaltlangin Aizawl Sumtual siam a ni.

AMC chuan khawpui chhunga ramngaw leh nungcha humhalh a, hmasawnna ngelnghet siam tura hma a lakna kal zelah Zonuam leh Ailawng-ah Eco-friendly park pahnih a siam a, October leh December 2025-ah khan mipui tlawh theihin hawn a ni. Vantlang Park tam zawk siam hi khawpui ramngaw (urban forestry) tihhmasawnna pawimawh tak niin, mipui tan len khawthawnna hmun a nih bakah boruak tha siamtu a ni a. Khawpui chhung tihfai hnathawh kal zelah Turial Veng bawlhhlawh paihna chu changtlung zawka siam aniin, Aizawl khawpui chhung ‘inert waste’ paihna tura duan a ni.

Sports & Youth Services Department hnuaiah Mizoram Sports Incentive Cash Award 2024-2025 chu sports discipline 15 huam chhunga infiammi 218 leh official 41 hnenah sem a ni a, a vaiin pawisafai cheng nuai 94 semchhuah a ni.

Mizoram Bana Kaih Scheme hnuaia Empowering Mizoram Sports (EMS) programme chu December ni 1, 2025 atang khan kalpui tan a ni a; Sports discipline pariatah ni 5 chhung awh Trainers’ Training a bultan a ni. He program hnuaiah hian sports discipline 24 thlanchhuah te chu category pathumah then a ni a. Heng zinga Olympic Games min thlen tir tura beiseiawm discipline pariat chu ngaih pawimawh bik an ni. Programme hi chhawng hrang hranga kalpui a ni ang a, grassroot coaching/talent zawnchhuah a bultan a ni ang. He hmalakna hnuaiah hian kum 8 atanga kum 15 inkar te training pek an ni ang.

A vawikhatna atan Mizoram Sorkar chuan Innovations India nen tangkawpin Aizawl International Half Marathon chu ni 27th April, 2025 khan buatsaihin, lawmman atan pawisafai cheng nuai  10 dah a ni. Aizawl International Half Marathon vawihnihna hi February ni 14, 2026-ah neih tura ruahman a ni a, mi tam zawk an rawn tel beisei a ni.

Prime Minister Pu Narendra Modi chuan Khelo India Scheme hnuaiah Tuikual, Aizawl a Multipurpose Indoor stadium sak tur chu September ni 13, 2025 khan lungphum a phum a. He Indoor stadium hi cheng vaibelchhe 11.5 hmanga sak tura ruahman a ni.

National Conference on DigiLocker neih zawh takah khan Ministry of Electronics & IT chuan Mizoram Sorkar hnuaia Information & Communication Technology Department hnenah "DigiLocker Accelerator" lawmman a hlan. Tangkai leh entawntlak taka DigiLocker an hman avanga ram chhung State tha pasarih thlan zinga Mizoram a tel ve hi ka lawm takzet a ni.

BharatNet project hnuaiah Mizoram chhung hmun hrang hrang 594 lai satellite broadband in thlunzawm a ni tawh a. A tichangtlung turin ICT Department chuan heng hmun thlante huamtu Gram Panchayat tin hnenah wireless router 500 a sem tawh a ni.

Tun hnai atang khan Mizoram Sorkar chuan Secretariat Office-ah e-Office project a kalpui tan a, hemi atan hian Department of Personnel & Administrative Reforms chu Nodal Department niin, Department of Information & Communication Technology chu Implementing Department  a ni. He hmalakna hian sorkar hnathawh chak zawk leh langtlang zawk a siam dawn bakah, lehkhapuan hmang lova hnathawh hian office chhung hnathawh mai bakah office dangte nena indawrna a chak phah zawk dawn a ni. Tun dinhmunah Secretariat Office 42 chuan he kalphung hi an zawm tawh a, Directorate leh Subordinate Office 25 ten an zawm theih nan ruahmanna siam zui mek a ni.

Mizoram Science, Technology & Innovation Council (MISTIC) chuan Bana Kaih Scheme hnuaiah district tin huap Chief Minister's Inventors Challenge chu Deputy Commissioner theuh te nen tangkawpin a buatsaih a. District level a tithate chu State level intihsiaknaah tel lehin, ‘innovation’ nei tha thlanchhuahte hnenah an bultanna tur Seed Fund cheng nuai 34.15 pek an ni.

Hmasawnna mellung chhinchhiahtlak tak kan hmuh pakhat chu Mushroom Centre changkang leh changtlung tak CSIR-Institute of Himalayan Bioresource Technology (IHBT), Palampur nen tangkawpa din hi a ni a. He project atana sum mamawh chi Sorkar laipuia Department of Biotechnology (DBT) atanga hmuh a ni.

Kan thiamna leh theihna te humhim a, kan thil neihte a neitu dik tak kan nihna lantir theih nan Intellectual Property lamah hma kan sawn chho zel a. Kum 2025-2026 chhung hian Patent Information Centre (PIC) hmalakna in patent 4, trademark 33, Industrial Design 14, Copyright 6 leh Geographical Indication (GI) 1 file thar a ni.

Mizorama Cooperative sector tihchak leh tihhmasawn kawngah hmalakna pawimawh tak tak kan hmu a, a lawmawm hle a ni. Vawiin thlengin kan state chhungah cooperative society 1500 chuang in register an awm a; sector hrang hrang - dairy, agriculture, fishery, piggery, sericulture, handloom leh handicraft-ah te state pum huapa hma la federation kan nei a ni. Member-te a innghat Cooperative chak leh hnathawh langtlang zawk siam turin Primary Agricultural Credit Society-te computerise an ni a, multi-purpose PACS tihlen a ni bawk.

Technology hmanga agriculture tihchangtlun hian sum senso ngai tihniamin, buh leh thlai tichhe thei harsatna hrang hrang laka inven dan te siamin, loneitute tharchhuah a pun phah mai bakah a daihrei phah a ni. Mizoram chuan Agriculture & Farmers' Welfare Department kaltlangin SASCI 2025-26, Part VII(B), Component-II hnuaia mellung tihhlawhtlin tur hmasaber chu a tlin tawh a. Hemi hnuaiah hian District tinah khaw pakhat tal Digital Crop Survey neih a ni. Thei leh thlai dahthatna hmun indaihloh avanga tawihral awm thin sutkian nan Rashtriya Krishi Vikas Yojana (RKVY) hnuaiah hmun paruk - Muallungthu leh Sihphir (Aizawl), DAO Complex (Lunglei), DAO Complex leh KVK North Vanlaiphai (Serchhip), leh Khanpui (Saitual)-ahte 5-MT solar-powered cold storage unit din tura ruahmanna siam mek a ni.

Centrally Sponsored Scheme pakhat, National Mission on Edible Oils-Oil Palm (NMEO-OP) hnuaia Oil Palm chin hna thawh kal zelah kum 2025-26 chhung khan Oil Palm chingtute'n an thawhpui company-te hnenah Oil Palm FFB 5599.12 MT an hralh a ni. Godrej Agrovet Pvt. Ltd., Bukvannei, Kolasib District chuan an Oil Palm Processing Mill-ah Crude Palm Oil (CPO) 877 MT an siamchhuak a. National Mission on Edible Oils-Oilseeds (NMEO-OS) Scheme hnuaiah hian Oil Palm bakah 'Tung' chin kalpui ni bawkin, Hmuntha (Serchhip District), Tualpui (Khawzawl District) leh Saitual District-ah te kalpui mek niin, chhungkaw engemawzat tan hlawkna a thlen dawn a ni. District pathum - Siaha, Kolasib leh Khawzawl-ah te Oil Mill bun tura hma lak mek a ni bawk.

Kum kalta chhung khan Horticulture Department chuan market tha a awm tih hriain sapthei chin kawngah nasa takin hma a la a, hei hian New Champhaia Passion Fruit Processing Unit din thar pawh a pui tura ngaih a ni a. Sapthei chingtute pawhin a nasa takin a hlawkna an hmuh phah a ni. Lakhuihthei chin pawhin hmasawn zelin, farmer-te sum lakluh pawh a tam phah a, a lawmawm takzet a ni.

Mission for Integrated Development of Horticulture hnuaiah Anthurium par tam zawk tharchhuak turin Aizawl District-ah Area Expansion Scheme (AES) kalpui mek a ni a. State pawn leh ram pawna Anthurium market a that avangin he hmalakna hi kalpui a ni. Sairang Railway Station hawn a nih khan Rajdhani a bungraw phurh hmasa ber ni turin Sairang - Phool Mandi, New Delhi ah Anthurium pangpar thawn a ni a, hei hi thil chhinchhiahtlak tak a ni.

National Bamboo Mission hnuaiah nikum khan Bamboo Processing Unit din a ni a. He unit hian Bamboo Treatment & Seasoning Plant, Bamboo Depot & Godown, leh Activated Charcoal Production Unit a keng tel a ni.

Animal Husbandry & Veterinary Department chuan ran vulh kalphung tihhmasawn a, ranchaw intodelh a nih theih nan leh ranvulhtute sum lakluh a lo pun belh theih nan ngawrh takin hma a la chhunzawm zel a. Mipui mamawh khawp artui kan tharchhuah a, kan in chawmzawh theih nan ar nuai khat lenna Poultry Layer Farm din tura hmalak mek a ni a. He farm hian nitin artui sing sarih tharchhuak thei tura duan niin, tender chhuah tawh niin, work order chhuah thuai a ni ang. Natna hri hrang hrang laka ranvulh te an him theih nan vaccine pek thin a ni a. Natna hrileng avanga ran vulh tihhlum neitute hnenah Assistance to States for Control of Animal Diseases scheme hnuaiah zangnadawmna pek thin a ni bawk.

Kumin chhung hian Fisheries Department chuan sangha tharchhuah tipung turin leh sangha khawi dan kalphung tichangtlung turin hma a la nasa hle a. SASCI scheme hnuaiah Ngaizel-ah sangha vawn thatna tur 15 tonne cold storage facility din a ni a. Hei bakah hian sangha dil thar, hectare 33.58-a zau siam niin, sangha chi khawina hectare 50.043-a zau siam a ni bawk.

Information, Public Relation, Printing & Stationery Department (IPRP&S) hnuaiah Printing & Stationery  chuan November, 2025 thleng khan Revenue Target an neih cheng nuai 150 chu 22.95 % in an khum tawh bawk a ni.

Awle, a tawp berah chuan, State leh Central Sawrkar hnuaia thawktu zawng zawngte bakah State Sorkar hnuaia pawl hrang hrang member-te chungah lawmthu ka sawi tak meuh meuh a. An hnaah inthlahdah lova an thawhna leh an inpekna chunga lawmthu ka sawi a ni. Tin, mipui aiawh a ding thlan tlin te, khawtlang hruaitute, tlawmngai pawl, thalai leh zirlai pawlte, thuthar lakhawmtute leh Mizoram mipuite hnenah State hmasawnna atana in hnathawh pawimawh tak avangin lawmthu ka sawi takzet bawk a ni.

Hna thawh that avanga vawiina State Medal chawimawina dawngtu zawng zawngte lawmpuina ka hlan a. Armed, Unarmed leh School Contingent-te leh Band Party te chungah lawmthu ka sawi bawk a ni.

India ram pum leh Mizoram chhung mipuite chibai ka hlan nawn leh duh che u a. India ram hi hnam hrang hrangin kan intawm ram ropui tak a ni tih hre rengin, inpumkhatna leh rinawmna vawng nung turin mawhphurhna kan nei theuh tih theihnghilh lo ila. He hun urhsun leh ropui takah hian zahawmna, remna, hausakna leh inlungrualna a khat Mizoram siampuiah in zavaiin ka sawm a che u.

Ka lawm e. Jai Hind.