1117/2026-2027

Aizawl, the 22nd June, 2026: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin khan Central Agricultural University (CAU), Imphal hnuaia thutkhawm pawimawh tak tak pathum - 15th Research Council Meeting, 11th Extension Education Council Meeting leh 33rd Academic Council Meeting, June 22-24, 2026 chhunga neih tur chu College of Veterinary Sciences & Animal Husbandry (CVSc& AH) Selesih, Aizawlah Khuallian niin a hawng.

Hawnna puala thu a sawiah Larsap General (Dr) Vijay Kumar Singh chuan Central Agricultural University chu hmarchhak state agriculture sector-a hmasawnna thar thlentu pawimawh tak a nih thu sawiin, Council pawimawh tak tak neih tur 3 - Reserch Council, Extension Education Council leh Academic Council-te chuan laboratory hna, loneitute thleng pha leh classroom zirna thleng a huam kim vek avangin thiamna a tak ngeia hman tangkaina a lantir a ni, a ti a. CAU-in policy kaihhnawih lehkhabu tha tak "Transformation of the Mizoram Economy from US Dollar 540 Millions to US Dollar 6,394 Million @ 2047" an siam chu lawmawm a tih thu sawiin, Mizoram chu agriculture-a innghat a nih avangin he ruahmanna awmze nei leh huapzau tak hian Mizoram hmakhaw eng tak a siam thei dawn a, harsain lang mahse, tih tak takna leh loneitute sum lakluh tipung chung zelin kan hlen theih ngei ka ring a, kan tum phawt chuan kum 2047 hma pawhin kan puitlin theih ngei ka beisei, a ti bawk.

Larsap chuan hmasawn tura district leh khawtlang hrang hrang ten awmze nei taka hma an lak theih nana ruahmanna siam a tul thu leh, tumah hmaih bik awm lova agriculture leh a kaihhnawiha tanlak nasat a tul thu sawiin, agriculture sector chu thingtlanga chengte innghahna mai a ni lova, dik taka kalpui a nih chuan danglamna nasa tak thlen thei leh India ram hmasawn Viksit Bharat siam kawnga tangkai tak a ni, a ti a. Sawrkar laipuiin loneitute hmasawn nan ruahmanna hrang hrang a siam thu leh hemi tihpuiltling tura mithiamte leh loneitute pawh tan ho a tul thu sawiin, scientist, college-a thawkte leh zirbingmi kalkhawmte chu thil thar leh tha zawk ngaihtuah chhuaka loneitute tha taka kaihruai turin a fuih a. Thiamna ten tumah hmaih bik awm lova mitin a thlen phak nan awareness campaign lamah hma la zel turin a fuih a. Thar chhuah ringawtah duh tawk mai lova, a hralhna changtlung tak a awm theih nan a sawngbawlna, tihhmelmawina, entrepreneurship, ei leh in rintlak leh him siam bakah leilung nena inrem dehchhuah lama ngaihtuahna seng turin a chah a ni.

India hmarchhaka agriculture leh a kaihhnawih tihhmasawn kawnga CAU hnuaia mithiam tak takte hmalakna fakawm a tih thu sawiin, Larsap a nih angin a tawiawm zel dawn thu a sawi a. Council pathum meeting tur chuan rah tha tak a chhuah ngei a beisei thu sawiin, India hmarchhak hmasawnna leh Viksit Bharat hlawhtlinna chu peng hrang hrang - laboratory, classroom leh loneitute hnathawhna hmunah a innghah tlat thu a sawi a. Kalkhawmte chu Mizoram leh hmarchhak state ten hma an sawn zel nana theihtawp chhuah puiah a sawm a ni.

Thusawitu dang Dr. Anupam Mishra Vice-Chancellor, CAU chuan he huna kalkhawmte lawmna thu sawiin, Central Agricultural University chu India rama agriculture university tha berte zinga mi a nih thu a sawi a. Hmarchhak state-a danglamna nasa tak awm chuan agriculture leh a kaihhnawih tihhmasawn kawngah remchanna nasa tak a pek thu sawiin, hmarchhak leh India ram hmasawn nan an thawk zel dawn tih a sawi a. Tun dinhmunah CAU-in hmarchhak hmun hrang hrangah College 13, KVK 6, Multi Technology Testing Centre 6 leh Vocational Training and Testing Centre 6 a neih mek thu a sawi bawk.

He hunah hian College of Community Science, Tura, Meghalaya duan chhuah Strawberry Jam, Litchi Jam leh Mango King Chilli Sauce siam dan technology ziahna bu chu thawhdunna thuthlung angin Larsap-in Pu Harshit T., Manager (Marketing Strategy), PRIME Rural, Shillong, Meghalaya kutah a hlan a. College of Community Science, Tura leh ICAR-CICR, Nagpur-te tangkawp siam chhuah Comilla Cotton Meditech product 4 te chu Larsap hian a tlangzarh bawk a. Aizawl, Saitual, Serchhip leh Champhai District atanga lokal loneitute hnenah lavender leh coriander chi a sem nghal bawk.

Heng bakah hian Larsap chuan Central Agricultural University buatsaih lehkhabu pawimawh hrang hrang 7 a tlangzarh, chungte chu;

1) Transformation of the Mizoram Economy: A Precision Agricultural Extension Blueprint for the Value Engine Cluster, Aligning with Viksit Bharat @2047.

2) The Annual Research Report for 2025-2026.

3) Package of Practices for Cultivation of Horticultural Crops under Protected Cultivation in the North Eastern Hills Region.

4) Patents and Copyrights of CAU.

5) Food Atlas of Meghalaya: Mapping the Foods of the Khasis, Garos and Jaintias.

6) Training Module for Dairy Farmers: A Comprehensive Guide for Modern Dairy Practices.

7) Souvenir on Graduation Day, College of Veterinary Sciences & Animal Husbandry.

Larsap hian College of Veterinary Sciences & Animal Husbandry, Selesih; College of Horticulture, Thenzawl leh KVK Aizawl ten he ni puala exhibition an buatsaih chu tlawhin a kawm bawk.

He hunah hian Prof. Pravat Kumar Roul, Vice-Chancellor, OUAT, Bhubaneswar; Dr. Dipijyoti Rajkhowa, Vice-Chancellor, Assam Agricultural University, Jorhat; Dr. Manmohan Singh Chauhan, former Vice-Chancellor, G.B. Pant University of Agriculture & Technology, Pantnagar, Uttarakhand; Prof. M.M. Adhikary, former Vice-Chancellor, BCKV, W. Bengal; Dr. K.M. Bujarbaruah, former Vice-Chancellor, AAU, Jorhat, Assam; Dr. Dheer Singh, Director, ICAR-NDRI, Karnal; Dr. P. Das, former DDG, ICAR leh official pawimawh thahnem tak an tel a ni.