2675/2026-2027 

Aizawl, the 14th October, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Ministry of Education hnuaia Yuva Sangam Youth Exchange Programme Phase-VII kaltlanga Mizoram rawn tlawhtu Goa zirlai 50 leh Ministry of Development of North Eastern Region hnuaia Ashtalakshmi Darshan Youth Exchange Programme Phase -II kaltlanga Mizoram rawn tlawhtu Chandigarh zirlai 20 te chu Durbar Hall, Lok Bhavan-ah a kawm. 

Larsap General (Dr) Vijay Kumar Singh chuan danglamna hrang hrang awm chu India ram tana malsawmna leh chakna hnar a nih thu sawiin, "Danglamna kara kan inpumkhat tlat theihna hi intlawhpawhtawnna, inkawmna leh inhriatpawhna hmang chauha puitlin theih a ni a ti. Zirlaite chu state leh union territory dangte tawng, hnam ziarang leh nunphungte zira hriat chian tum turin a chah a. India ram hmasawn Viksit Bharat @2047 puitlin turin thalaite an pawimawh thu leh hna thawh tur tam tak a awm thu sawiin, ram pum leh a chhunga cheng mipuite hriatchian hi Viksit Bharat atana pawimawh a ni a ti a. Zirlaite chu thu thang dik leh dik lo thliar hrang thiam tura chahin, India ram innghahna tur an ni tih hriaa khawtlang tana tha thawhtu tangkai tak nih tum turin a fuih a ni.

Larsap chuan Goa leh Chandigarh atanga zirlai leh anmahni hruaitu lokalte chu Mizoramah a lo lawm vek thu sawiin, Mizoram chu state ralmuang, mawi, fai leh boruak thianghlim tak awmna, ami chengte pawh thuawih thei leh nunphung mawi tak nei, traffic dan zawm tha leh khawtlang inlungrual tak an ni a ti a. An cham chhunga Mizoram danglam bikna, thatna an hmuh leh hriatte chu hawna nunpui tum theuh turin a chah a ni.

He hunah hian Dr. R. Lalchhanhima, Dean, Students' Welfare, Mizoram University (MZU) chuan inhmelhriattirna neiin programme buatsaih chhan a sawi fiah a. Dr. Zoramdinthara, Head of Office (HoD), Mizo Department, Mizorm University (MZU) chuan lawmthu sawiin hun hman a khar a ni. 

Yuva Sangam Youth Exchange Programme leh Ashtalakshmi Darshan Youth Exchange Programme-te hi hnam inpumkhatna atana hmalakna niin, hemi kaltlang hian state leh union territory zirlaite chu midangte hnam ziarangte zir tur leh inhrepawh tawn turin an intlawhpawh thin a ni.