2206/2026-2027

Aizawl, the 14th September, 2026: Ram chhung hmun dangte rualin vawiin khan Mizoramah Hindi Ni (Hindi Diwas) hman a ni a. Greenhill Public School, Aizawl buatsaih Hindi Diwas lawmna puala Hindi Concert, Vanapa Hall-a neih chu Larsap General (Dr) Vijay Kumar Singh, PVSM, AVSM, YSM (Retd) chuan Khuallian niin a hmanpui a, Education Minister Dr. Vanlalthlana chu Khualzahawm a ni.

Larsap General (Dr) Vijay Kumar Singh chuan Hindi thiam a pawimawh thu leh zirna kawnga danglamna siam a tul thu sawiin, kan hnam ziarang behchhan leh vuan chung zelin inthlak danglamna kan kalpui tur a ni, a nih loh chuan hlawhtlinna kan nei thei dawn lo, a ti. Mizoramin talent tha tak tak a neih tam thu sawiin, kan talent-te hi state chhungah chauh a tawp mai loh nan state pawn leh khawvel hmun dang thlenga kan pho chhuah angai a, hemi tur hian tawng dang kan zir a pawimawh a ni a ti. Tawng dang thiam chu zirna, hnathawhna, sumdawnna leh khualzin dawnsawn kawnga a tangkai thu sawiin, "Tawng thiam tur chuan tihsual palh pawh a awm thei, mahse hlauh loh tur, tih dik lohna atang zel hian kan inzir thin a ni," a ti. Mizoram sawrkarin zirna inah "Thla khata nikhat hindi tawng hman ni" kalpui a tum chu lawmawm a tih thu a sawi a. Zirlaite chu midangte hnam ziarang, nunphung leh tawng zir turte, lehkhabu chhiar zau tur leh India history-te zir nasa turin a chah a. Tum sang tak neia taima taka lehkha zir turin a chah a ni.

Hindi Diwas puala Hindi Concert changtlung tak Greenhill Public School-ten an buatsaih chu fakawm a tih thu leh a hlawhtlin theih nana theihtawp chhuahtu zirtirtu leh zirlaite chhuanawm a tih thu sawiin, school motto "Transforming Education" tih nen pawh a inhmeh hlea a hriat thu a sawi a. Khawvel thang chak takah zirlai ngawr ngawra tih that a tawk lo tih sawiin, hriatzauna, themthiamna, nungchang mawi, inthununna, inrintawkna bakah khawtlang leh ram tana inpekna neih tel a pawimawh thu a sawi a. Zirlaite chu India leh khawvel hmun dang hmaa inrinngtawk tak chunga intihsiakna hmachhawn thei tura tan la turin a fuih a. Mahni hnam ziarang leh nunphung hloh chuang lo hian kan hawiher leh thlen chin kan tih zau a tul a ni, a ti bawk.

Khualzahawm Education Minister Dr. Vanlalthlana chuan India chu ram zau leh ze hrang hrang nei, tawng hrang hrang awmna a nih avangin mipui tam zawkte tawng hman Hindi thiam a pawimawh thu a sawi a. Hindi chuan midangte nena inbiakpawh leh hna thawh kawngah awlsamna a thlen thu sawiin, Mizo hnam ziarang leh nihna hloh chuang lovin Hindi tawng hi zirin tangkai takin kan hmang thei a ni a ti. Modern Education-ah tawng chu exam atan mai ni lova, ataka hmang thei tura zir ngaih pawimawh a nih thu sawiin, Mizoram Education Reform Committee-in Hindi tawng zir a pawimawh zia hriain "Thla khata nikhat hindi tawng hman ni", rawtna an siam a, hei hi bawhzuiin guide book-te pek chhuah a ni a, hmalak mek zel a ni, a ti a. Education Minister chuan Mizo hnam ziarang leh nunphung vawnghim chung zelin Hindi a zir theih tih sawiin, hemi kawnga Greenhill Public School-te hmalakna chu fakawm a tih thu a sawi bawk.

He hunah hian Rev. Dr. K. Thanzauva, Director, Greenhill Public School chuan kalkhawmte lawmna thu a sawi a. Hindi concert neih niin cultural items mawi leh hmuhnawm tak tak Greenhill Public School zirlai leh zirtirtute bakah Pradhan Mantri Rastriya Bal Puraskar-Awardee Esther Hnamte ten an entir a. Pu David Zothanmawia, Vice Principal-in lawmthu sawiin hun hman a khar a ni.

He hunah hian Environment, Forests & Climate Change Minister Pu Lalthansanga, Education Minister hlui Pu Lalsawta, Padma Shri C. Kamlova, Mizoram Education Reform Committee member-te, Greenhill Public School Board Member-te bakah zirtirtu leh zirlaite an tel a ni.