Mizoram Larsap Pu Vakkom Purushothaman chuan zan khat riak turin nimin tlai dar 4:00 khan Serchhip a thleng a, Serchhip ah hian 14 Assam Rifles ten lo mikhualin vantlang puala Larsap lawmna inkhawm 14 Assam Rifles Auditorium ah neih a ni a, hetah hian Cultural Programme hman niin malzai bakah mizo hnam lam hmuhnawm leh benglut tak tak entir a ni a, Manipuri Dance mit ti tlai tak entir a ni bawk.

Amah lawmna inkhawmah Larsap chuan Mizoram chu ziak leh chhiar tamna State an ni chu chhuanawm tih thu sawiin, 98% aia sang ziak leh chhiar thiam nih hi thil namen lo  tak a ni a ti a, hetih rual hian Sawrkarin mi zawng zawng tan hna a pe vek seng lo tih hriat a tul thu leh, mahni ke pawha ding thei tura inzir a pawimawh thu a sawi a, ziak leh chhiar mai a tawk lova, thiamna bik neih a tul a ni a ti bawk. Larsap chuan Mizo thalaite  chona hmachhawn tura rilru huaisen pu an tam tawk lo ni a a hriat thu sawiin Kerala ah chuan lehkhathiamte chu khawvel hmun tinah an kal darh a, India ramah pawh hmun tinah an awm a ni tiin Mizoramah ngei pawh a tlawh chin khua ah chuan Kerala mi a hmuh deuh zel thu a sawi a, Mizo thalaite chu an thiamna chher hriam a India ram mai nilo khawvel ram hrang hrang dai darh turin a chah a ni.

Larsap chuan Mizoram hmun tam takah chhungkawnu ber eizawnga hnathawka chhungkaw pa ber in a awm mai mai a hmuh hnem thu a sawi a, thatchhiatna leh rampawna eizawng tura chhuah ngamna Mizoten kan mamawh zia thu uar takin a sawi a ni.

Larsap chuan Mizoramah Kohhran leh tlawmngai pawl hrang hrangte hnathawh dan chu fakawm a tih thu sawiin a bik takin YMA ang hi khawiah mah a la hmuh ngai loh thu a sawi a, hemi rual hian India ram hi sakhaw zalenna ram a ni tih hriat tlat a tul thu erawh kan zavaia tihmakmawh a ni a ti bawk. Larsap chuan kerala ah chuan Kristian za a sawmpanga (15%) chauh an awm laiin Chief Minister atan Kristian thlanchhuah a ni a ti a, hei hi India ram timawitu ani tiin hnam tlem zawk leh sakhaw betu tlem zawkte kan hmusit mai tur a ni lova India chuan sakhaw betu zawng zawngte inangkhat vekin a en a ni tih a sawi a, amah ngei pawh Krismas niin Presbyterian inkhawmna a a inkhawm ve thu leh inkhawmna dinga tawngtai an tih pawhin a tih ve mai zel thu a sawi a, sakhaw dang be tu te nen inzahtawn leh indawhthei tawn taka kan kalho a tul a ni a ti bawk.

Nimin  tlaia Larsap lawmna inkhawmah hian Serchhip Bawrhsap Pu P.Lalchhuanga’n Serchhip District chanchin ngaihnawm takin a sawi bakah Larsap hi Serchhip mipuite aiawhin “Darbu” a hlan a, Serchhip Sub-Headquarters YMA Cultural Troupe ten Mizo hnam lam chi hrang hrang mawi taka remkhawmin an entir a, mimal zaithiam zai ngaihthlak anih bakah Manipuri Dance hmuhnawm tak entir a ni bawk. Larsap chuan amah lawmna inkhawma item nei zawng zawngte hnenah thilpek a hlan theuh a ni.

Larsap pual hian 14 Assam Rifles Commandant Col. Ratnakar Trivedi chuan zanriah a buatsaih sak bawk a ni.

Ruahman lawk ang chuan Larsap hian vawiin  18th January, 2012 zing dar 9 ah Serchhip chhuahsanin Baktawng Tlangnuama Pu Ziona te chhungkua a tlawh ang a, Thingsul Tlangnuama BRTF hmunah chhunchaw fakin Aizawl a pan dawn ani.

Larsap hi a nupui Pi Lily Purushothaman, Pu K.Lalnghinglova IAS, Secretary to Governor bakah Pu Robert Lalchhuana, Editor Romei Daily Newspaper ten Aizawl atangin an tawiawm a ni.