Mizoram Larsap Pu Vakkom Purushothaman chuan nimin chhun khan Thenzawl a tlawh a, Thenzawlah hian Serchhip Bawrhsap Pu P.Lalchhuanga leh Superintendent of Police Pu Milind Dumbere, IPS bakah Thenzawl khawchhunga sawrkar hnathawk hrang hrangte bakah tlawmngai pawl hrang hrang aiawhte, kuthnathawktute leh zirlai naupang ten PWD IB ah an lo hmuak a, Thenzawlah hian chhunchaw fakin, Thenzawla mimal puan tah te an hmunah kalin a tlawh bakah Mizorama tuikhawhthla (waterfall) sang ber “Vantawng Khawhthla” a hmunah kalin a en bawk.

Thenzawl PWD Inspection Bungalow tualzawlah Larsap hmuahna inkhawm buatsaih a ni a, hetah hian thusawiin Larsap chuan mizo naupang duhawm tak tak leh hmel hlim tak tak a hmu thin chuan a rilru a tilawm thin a ni a ti a, India ram chu Democracy ram anih avangin mi zawng zawng tan dinhmun sang ber thlen theihna kawng a inhawng a, President hlui K.R.Narayanan pawh Kerala mi niin Scheduled Caste anih mai bakah mirethei Dap In a seilian leh sikul kai tura nitin mel 10 chuang ke a kal thin anih thu a sawi a, amah lawm tura kal naupang leh zirlaite chu an zirlai tha taka an zir chuan mihlawhtling leh ropui tak tak an la ni thei tihsawiin inthlahdah miah lo turin a fuih a ni.

Larsap chuan khualzin hip (Tourism) lama Mizoramin tan lak nasat a ngaih zia thu sawiin Kerala hi India rama hmun nuam “God’s Own Country” ti ngata an inchhal thin thu a sawi a, Mizoram a rawn thlen hnu a nuam a tih thu leh Mizoram mawi a tihna chuan a hneh em avangin Mizoram hi “God’s Own Country” tih phu zawk hiala a hriat thu sawiin, Mizoram hian Pathianin thilpek ropui tak tak a pek te hi sum ah a la chantir thiam tawk lo a ni a ti a, Mizo puantahte leh handloom industry product chi hrang hrangte, hnam lam leh hnam zia rang ngainatawm tak takte hi khawvel hriata tarlan loh atan chuan a uihawm ani tiin mahni inzahpui mai lova khawvel huapa hnamtin leh ramtin hip turin tan lak a tul a tih thu a sawi bawk.

Larsap lawmna inkhawmah hian Thenzawl khawchhunga sawrkar hnathawk hrang hrangte bakah tlawmngai pawl hrang hrang aiawhte, kuthnathawktute an tel tha hle a, Presbyterian English School zirlaiten Chawnglaizawn hmuhnawm tak an entir bakah C.Zalawma School zirlaiten Cheraw mawi takin an kan bawk a ni.

Larsap lawmna inkhawm hi Pu H.Dolianbuaia SDO(C), Thenzawl in a kaihruaia, Dr. Christopher L.Hmar-in inlawmna thusawiin Pu L.Sailova, VCP Thenzawl-in lawmthu sawina hun a hmang a ni.

Amah lawmna inkhawm hman zawh anih hnu hian Pu H.Dolianbuaia SDO(C), Thenzawl-in chhunchaw a buatsaih sak chu a fak a, hemi hnu hian Thenzawl khawchhunga mimal, mahni a handloom industry (small scale) lo kalpui tute a hmunah tlawhin an hnathawh dan kalhmangte a zawt a, puantahtute pawh hian an harsatna tawh te Larsap hnenah hian an lo thlen a ni.

Hemi hnu hian Larsap chuan Thenzawl khaw daia awm Mizorama Tuikhawhthla sang ber “Vantawngkhawhthla” chu a hmunah kalin a en a, hmuhnawm a tih thu leh Mizoram mawina hi puanzar tlak anih takzet thu a sawi uar hle a ni.

Larsap hi a nupui Pi Lily Purushothaman, Pu K.Lalnghinglova IAS, Secretary to Governor bakah Pu Robert Lalchhuana, Editor Romei Daily Newspaper ten Aizawl atangin an tawiawm a ni.