Vawiin khan Social Welfare Department bultumin Lammual ah Pawl Kut hlim taka hman a ni a, Pawl Kut hawnna programme hi Larsap Shri Kummanam Rajasekharan’n khuallian niin a hmanpui a, he hunah hian Social Welfare Minister Dr. K. Beichhua chu khualzahawm a ni.

Larsap Kummanam Rajasekharan chuan Pawl Kut hi lawmthu sawina kut anih angin kan thlahtute he Kut min hnutchhiah tute hre renga, an chungah lawmthu kan sawi tur a ni, a ti a. Social Welfare Department in Pawl Kut hman anih theih nana hma an la leh vawiina buatsaih ani ta chu lawmawm a tih thu sawiin Mizo hnam ziarang a chawikan leh a chawinun ngei a rin thu pawh a sawi bawk a ni.

Larsap chuan mahni tobul leh hnam ziarang chanchin hre lo mihring chu thingkung zung nei lo ang mai an ni tih sawiin changkanna chitin rengin mihring hi min bawh in hma min sawn tir mahse, kan mihringpui dang te’n a mi hriat hran theihna chhan chu kan culture hi a ni, a ti.  Mahni hnam ziarang, inchei dan leh culture vawnhim leh chawisan chu mitin an mawh a lak a pawimawh thu sawiin hetiang kan tih loh chuan hnam anga identity te hi a bo a hlauhthawnawm a, hnam anga kan value te ngaihhlutna chang kan hriat loh chuan engtik ni ah emawni ‘kan khawvel’ te hi kan hriat loh a hlauhawm a ni, a ti. 

Larsap chuan naktuk a ram tana mi chhenfakawm leh khawtlang tana mi tangkai ni tur – thalai leh naupang te hi thu thaa kaihhruai a, value system tha leh dik nu leh paten kan rochhiah chu thil pawimawh leh tul nia a hriat thu a sawi. Tun hmaa thlawhhmaa thalai leh naupang te thawhrimna hriat reng nana pi leh puten Pawl Kut hi naupang leh thalai puala Kut bik anga an lo neih te kha tihawm tak nia a hriat thu a sawi bawk.

Mizoram mipui te chu Krismas leh Kumthar duhsakna hlanin Mizoram mipuite te kawng tin renga Mizoramin hma a sawn zel theih nan theihtawp chhuah chhunzawm zel turin a chah bawk a ni.

Khualzahawm Social Welfare Department Minister Dr. K. Beichhua pawhin hun hmangin Pawl Kut chu Lawmthu Sawina Kut anih tel angin vawiinah hian lawmthu sawi tur kan ngah hle a. Kohhran leh mipui ten Sawrkar tha zawk leh rorelna chak zawk te, ei leh bar leh hmasawnna chi hrang hranga hma kan sawn theih nan mitin te nitin tawngtaia, chumi hlawhtlinpui tura kan thlanchhuah Sawrkar thar hi min tawngtaipui zel turin ka sawm che u a ni, a ti. Nakum lamah hei aia huapzo leh ropui zawka hman ruahman a nih tur thu a sawi bawk a ni.

Pawl Kut lawmna inkhawmah hian Pi Vanlalrawni, Secretary, Social Welfare Department chuan inlawmna thu sawiin, Pu Hmingthanzuala, Director, Art & Culture Department in Pawl Kut chungchanga ziak miten an lo ziah dan hrang hrang te sawiin, Pawl Kut chanchin a sawi a, Pi Laldikkimi, Director, Social Welfare Department in lawmthu sawina neiin Pawl Kut hawnna inkhawm a khar a. Chawhnu lamah Cultural Session leh Music Session nen hun hlimawm tak hman a ni.