Vawiin khan Home Minister Pu Lalchamliana chuan a office thar a luah lut a, amah tawiawmtute nen Pathian hnena lawmthu sawina hun an hmang.

Pu Lalchamliana chuan Pathian leh mipuite duhsakna zarah thlan tlina a awm leh Minister dinhmun pawimawh tak luah thei dinhmuna a ding chu lawmthu a sawi a. A hna chanpual chu huphurhawm hle mahse Pathian tanpuina in sawrkar hna thawk leh mipui tawiawmna nen tha taka hlenchhuah theih a inbeisei thu a sawi a ni.

Minister Pu Lalchamliana hian Home Department, Taxation Department leh Disaster Management & Rehabilitation (DM&R) a enkawl dawn a. Vawiin programme tawi buatsaihah hian heng department tina official pawimawh te bakah MLA thlan thar pahnih - Pu C.Lalmuanpuia leh Dr F. Lalnunmawia ten an tawiawm a, a nupui leh fate leh amah lawmpui tu mi engemawzat an kalkhawm. Hunserh hi Presbyterian kohhran pastor, Rev. Lalrinmawia'n a hmang a ni.