Vawiin chhun khan Mizoram Larsap Pu Vakkom Purushothaman chuan Khawvela chhungkaw lian ber a chhal Pu Ziona leh a chhungte Baktawng Tlangnuam a awm chu a tlawh a, Pu Ziona te hian Chhuanthar Stadium ah Larsap hi ropui takin an lo hmuak a, Chhuanthar Run ah Pu Ziona nen inkawmna hun tha tak an hmang bawk.

Larsap chuan amah lawm tura mipui kalkhawmte hnenah thusawiin Mizoram Governor tura ruat a nih tirhin Mizoramah mi pahnih chiah hriat a neih thu sawiin chung mite chu Mizoram Chief Minister Pu Lal Thanhawla leh Pu Ziona te an ni a ti a, Pu Ziona leh a chhungkuate bakah Tlangnuam khua chu hmuh ngei ngei tuma rilru siam sa vek a nih thu a sawi a, mipuiten an lo lawm dan chu ropui a tih thu leh a rilru a khawih thu a sawi a, hun thawl zawk neia tlawh leh ngei a duh thu a sawi bawk.

Larsap chuan amah lo lawm tura inbuatsaihna nasa tak avanga lawmthu sawiin a bik takin zirlai naupangte parade chu hmuhnawm a tih lehzual thu a sawi a, a theih chuan kumin Republic Day parade Aizawla neih turah tel ve ngei thei se a duh thu a sawi bawk a ni. Zirlaite chu an discipline tha leh an thuawihna lo lang chu fakin tun hun hi an hun neih tha ber a ni tih hre turin a chah a, an zirlaite thahnemngai taka zira tawrhchhel tura fuihin an tan khawvelah tih theih loh reng a awmlo a ni tih hre reng turin a chah bawk a ni.

Larsap chuan Pu Ziona leh a pawlte invawn dan chu entawntlak tak anih thu sawiin an khawtlang tana an thawhhona leh hmalakna te chu fak tlak leh zir tham tak nia a hriat thu a sawi bawk a, Pu Ziona leh a pawlte hnenah hian thilpek – Keyboard, Football 3 leh tangkafai Rs. 5,000/- a hlan bawk a ni.

Chhuanthar Stadium-a Larsap hmuahna leh lawmna inkhawm ropui tak ah hian item mit leh beng titlai tak tak entir a ni a, Chhuanthar Military Band Party ten Parade ropui taka hma hruaiin Chhuanthar Students’ House leh Hunthar High School, Chhuanthar zirlaiten parade hmuhnawm dangdai tak mai an entir a, parade pah a Larsap leh a thiannu te hming an han remkhawm vel chuan Larsap te nupa leh mipui kalkhawmte lawm a hlawh hle a ni. Zirlai ho parade zawh hian Chhuanthar valrual ten Khuallam chi li – Lamtluang, Arpui Tual Thai, Tlau Kal (Kawrpui Thlakisen Lam) leh Vasir lam hmuhnawm tak tak an entir a, hemi hnu hian Larsap puala Pu Ziona’n Chheih hla a phuah chu sa in Chhuanthar valrualte Chhuanthar Stadium tualah an chheih bawk a ni.

Chhuanthar Stadium a hun hman anih hnu hian Larsap chuan Pu Ziona chenna In “Chhuanthar Run” a tlawh a, hetah hian Pu Ziona chuan thingpui ruai buatsaihin a nupui fanau te nen Larsap hi an lo lawm a, inkawmna hun tha tak an nei a ni.

Pu Ziona leh a pawlte hian Larsap an hmuhna Chhuanthar Stadium hi anmahni kutkawih liau liau in thangkhat lian zet chhungin an sa puitling thei a, tunah hian zirna In pathum, Primary School, Middle School leh High School te an nei a, zirtirtu indaihlohna avanga harsatna an tawh chu Larsap chuan hmalak sakin sawrkarin zirtirtu a pe thuai dawn a ni tih thu thar an hriat avangin an lawm hle a ni.

Pu Ziona leh a pawlte hi Baktawng Tlangnuam-ah awmin tunah hian  In zathum vel niin an inchhal a, mihring hi a lu nungin sanghnih vel niin an inchhal bawk. Anmahni inrelbawlna kawnga venhim hna thawktu Military Police 331 bakah  Tlangval 177, Nu 422 leh Nula 149 an awm mek bawk a ni.

Pu Ziona hi kum 1944 July ni 21 ah a piang a, tuna an chhungkaw dinhmun chu Nupui 39 neiin, Fa 86 (Mipa 40, Hmeichhia 46) a nei a, Tu (Grandchildren) 125 (Mipa 59, hmeichhia 66) neiin, a fapa te zinga 13 in nupui an nei tawh a, a fanu te zinga 23 in pasal an nei tawh bawk. Tuna Chhuanthar Runa Pu Ziona leh a nupui fanau leh a tute cheng zawng zawng chu mi 161 an ni.

Pu Ziona te a tlawh zawh hian Larsap chuan Thingsul Tlangnuama 24 BRTF tlawhin chhunchaw a fak a, BRTF te hian Larsap hnenah ngaihhruina an lo hlan bakah Larsapte nupa hian thing (Asoka Tree) an phun nghal bawk a ni.

Larsap hian a haw pahin Selinga Samaritan Riangvai Run a tlawh bawk a Home tanpuina atan tangkafai Rs. 5,000/- Home Father K.T.Khawla hnenah a hlan a, Larsap chuan mi chanhai riangvaite tana rawngbawlna hi a ngaihhlut ber leh a ngaihpawimawh berte zing ami anih thu a sawi a ni.

Samaritan Riangvai Run hi kum 1993 a din tan niin tunah hian mi 100 enkawl mek an ni a, an zinga 50 hi pianphung leh nihphunga rualbanlo te  niin, a dang 50 chu fahrah an ni a, hlawh neilovin mi tlawmngai 8 in heng mi chanhaite hi thahnemngai takin an enkawl mek a ni.

Larsap hi a nupui Pi Lily Purushothaman bakah Pu K.Lalnghinglova IAS, Secretary to Governor leh Pu Robert Lalchhuana, Editor, Romei Daily Newspaper ten an tawiawm a ni.