Kumin Rabindranath Tagore pian champha phak 150-na pualin rampumah Indian National Trust for Art & Cultural Heritage (INTACH) bultumin ‘Power of the Pen - Tagore at 150’ tih thupui hmangin class 8-11 zirlai naupangte tan Painting leh Essay Competition buatsaih a ni a. Vawiin khan INTACH, Mizoram Chapter pawhin Govt. Mizo HSS-ah Tagore hriatrengna inkhawm leh painting leh essay competiton a huaihawt a ni.

‘Tagore’s 150th Birth Anniversary’ inkhawm hi INTACH Secretary Pu Thanseia’n a kaihruai a, INTACH Convener Pu P.Rohminthanga IAS (Rtd) leh Co-Convener Pu C.Chawngkunga ten INTACH hmalakna hrang hrang leh vawiina Tagore hriatrengna inkhawm buatsaih a nih dan chungchang an sawi a. Dr. Margaret L. Pachuau, Asst. Prof., Department of English, MZU chuan Rabindranath Tagore chanchin kimchang takin a sawi bawk. Vawiina painting leh essay competion-ah hian school 5 atangin zirlai 26 lai an tel a, an thuziak leh lemziak te hi Tagore-a hmunpui Shanti Niketan, West Bengal-ah thawn thlak a ni ang a, rampum huapa lawmman sem pawh Shanti Niketan hmunah hian neih a ni bawk dawn a ni.

Rabindranath Tagore hi May ni 7 1861-ah piangin, August ni 7 1941-ah a boral a. India rama mi ropui leh hmingthang chungchuang, thu leh hla, zai leh rimawi ngaina leh thiam tak mi a ni a, sulhnu thahnem tak a nei a ni. Kum 1913 daih tawh khan Nobel Prize in Literature a lo dawng tawh a, Europe mi lo hnamdang hemi Prize dawng hmasa ber a ni nghe nghe. Tagore hi kum 60 a tlin hnuah lemziak lamah pawh a tui chho zel a, ama din ngei art & culture hmunpui lar tak Shanti Niketan-ah a kutchhuak lemziak 1500 chuang leh a hlaphuah 2230 hmuh tur a awm nghe nghe a ni.