Mizoram Larsap Lt. Gen M.M. Lakhera, AVSM, PVSM, VSM chuan vawiin zing dar 10:00AM khan Aijal Club Conference Hall-ah Zoram Research Foundation (ZoRF) buatsaih "National Seminar on Peace & Development in Mizoram: Challenges and Prospect" a hawng. He National Seminar hi ZoRF ten Indian Council of Social Science Research - North East leh Mizoram University te bakah Information & Public Relations Department, Mizoram te nena tangrualin Remna Ni champha vawi 25-na puala an buatsaih a ni.

Seminar hawnna thu sawiin Larsap Lt. Gen M.M. Lakhera chuan Mizoram leh India inremna thuthlung (Peace Accord) hlawhtlinna chhan chu remna leh muanna a awm theihna atan khawtlanga pawl hrang hrang ten theihtawp an chhuah avang te, remna duha Mizo mipuite leh India sorkarin an beihna, an tih tak takna leh an inpumkhatna avang te a ni a ti a. Remna leh muanna avangin Mizoramah kawng hrang hrangin hmasawnna nasa tak a thleng a ni a ti a; fur hun chhung rei lutuk hian hmasawnna hna thawh enge maw chenah a ti thuanawp thin tih sawiin Mizoram hmasawnna atana kan ruahmanna te tihdanglam hret a that a rin thu a sawi bawk. Zirnaa hma kan sawnna te, ziak leh chhiar thiam 91.58% lai awma India ram puma 3-na kan ni te, India hmarchhaka state hmasawn ber kan ni te hi remna leh muanna avang a ni a ti. Remna leh muanna kan neih avangin nasa takin hma kan sawn a, hmabak tamtak la neiin kan hmasawnna te hi kan duh khawp la tling rih lo mah se remna leh muanna hi kan chhawr lo tih theih rual a ni lo a ti a, hun lo kal zelah Mizoram hian India hmarchhak leh rampuma state te zingah a dinhmun dik tak a luah phak ngei a beisei thu a sawi bawk. Helna a lo awm hian tharuma nuai reh tum mai lovin a chhan zawng chhuaka tihdam a tul a ni tih sawiin kan hun tawn tawhte atanga inzir zel a tul thu a sawi a. Larsap chuan Mizoram remna thuthlung hlawhtlin chhan hi uluk zawka zir chhuaha ram dangah te remna thlen tura hman tangkai a nih theihna tura hmalak a tul tih a sawi bawk a ni.

Seminar hawnna hun hi ZoRF Chairman Prof. Thangchungnunga, Registrar, MZU in a kaihruai a. Organising Chairman Dr. Sangkima'n kalkhawmte lawmna thu sawiin ZoRF Senior Vice President Prof. C. Nunthara, Vice Chancellor, William Carey University, Shillong in Keynote Address a sawi a. ZoRF Senior Vice President Pu P. Rohmingthanga IAS (Retd.), Pro. Vice Chancellor, ICFAI University, Mizoram in Vote of Thanks a sawi bawk.

Seminar-ah hian Pu R.D. Pradhan IAS (Retd.), Union Home Secretary lo ni tawh, India sorkar aiawha Peace Accord-a hming ziaktu te, Pu Lalkhama IAS (Retd.), Mizoram Chief Secretary lo ni tawh, Mizoram sorkar aiawha Peace Accord-a hming ziaktu te, Dr. Robert Halliday, Coordinator, Social Front Department, Mizoram Presbyterian Church Synod te, Pu Subir Bhaumik, BBC Correspondent leh Yogendra Yadav, Senior Fellow, Center for the Study of Developing Societies, New Delhi te buatsaih paper zir ho a ni.