Ni hnih awh Inspire Awards Scheme 2010-2011 hnuaia 1st State Level Science Exhibition chu Govt. Comprehensive Model School, Mission Veng-a neih chu nimin tlai khan Education Minister Pu Lalsawta'n a khar.
Kharna inkhawmah hian Minister chuan State tam takin an puitlin ve theih loh Inspire Awards Scheme hnuaia Mizoram khaw hrang hrang school tam tak tuam a Science Exhibition hlawhtling taka buatsaih a ni chu lawmawm a tih thu leh a mawhphurtute fakawm a tih thu a sawi a. Exhibition a model hrang hrang sikul naupangte pho chhuah a thlirin Mizoram hmel thar hmu a a inhriatthu leh zirlai ten zirlaibu a inziak vawng (by heart) ringawt lova a taka chhawr tlak thiamna paw chhuak ngei a a hriatthu a sawi a. Khawl ropui tak tak siam chhuah kawngah te leh ram leilung hausakna ah mi ram tluk lo mah ila, mihring finna leh theihna Human Resource hmanga tih theih thil tam takah erawh khawvel tukverh kan dak pha a ni, Minister chuan a ti a. State Level Science Exhibition a a titha zual thlan chhuah te a lawmpui thu sawiin a tling zo ta lo te pawh beidawng lova tang sauh sauh turin a fuih a ni.
District hrang hranga Science Exhibition buatsaih a nih hnuah a titha zual zirlai 78 thlang chhuakin heng zinga 71 te hian June ni 28 leh 29 hian inelna an nei leh a. Rampum huapa inelna National Science Exhibition 14th-16th August, 2011 chhunga New Delhi-a Prime Minister hawn tura Mizoram ai awh turin a titha zual zirlai 5 thlan an ni a, Certificate leh Rs. 2,000/- pek theuh an ni. Chungte chu Henry VL Malsawma, Downtown English School, Lawngtlai (Powerless food storage box), Eddie Zoremsanga, Hmarveng H/S Kolasib (Diversified Farming), C.Lalmuanpuia, St. Paul's HSS, Tlangnuam (Rain Water Harvesting), Sneha Sudha, Mary Mount School, Tlangnuam (Automatic Room Power Controller) leh C. Lalremruata, DIET Practising School, Lunglei (Solar Water Purification Method) te an ni. He rampum huap inelna a kal tur zirlaite leh anmahni kaihruaitu tur zirtirtute kal man leh senso zawng zawng hi sorkar laipuiin a tumsak vek dawn a ni.
He Science Exhibition hi zirlai ten an hlut hle a, school 38 atangin zirlai 2628 in an tlawh a ni. Kharna inkhawm hi SCERT Director Pi Malsawmthangi'n kaihruaiin Inspire Award State Nodal Officer Pu R.S Chauhan chuan Inspire Award kalphung leh tobul te bakah Exhibition an buatsaih dan tlangpui a tarlang bawk. Hmarchhak bialah Mizoram hi Inspire Awards Scheme hnuaia District leh State level Science Exhibition hlawtling taka buatsaih thei hmasa ber niin khaw hrang hrang a School tuam chhuak hnem ber a ni bawk.
