3552/2022-2023 

Aizawl 11th February 2023: Vawiin khan Irrigation and Water Resources Minister Pu C. Lalrinsanga chuan Sailam rama Lau Lui MI Project siam thar chu Loneitute kuta hlanna hun a hmanpui.

Irrigation and Water Resources Department chuan JICA project Technical Cooperation Project (TCP, JICA) hnuaiah Department dang pathum – Agriculture Department, Land Resources, Soil and Water Conservation Deptt leh Horticulture Department te nena tangrualin Sailam khuaa Lau Lui MI Project hi an kalpui a. He project hnuaiah hian Aibawk RD Block chhunga Sailam khuaa loneitute tan leilet  chawmna tui kawng tha zawk  leh a panna kawng thawm that hna thawh a ni a. A project hi zawh fel a nih tak avangin vawiin khan helai hmuna leilet neitu Charpui Water User Association te hnenah a changtu Minister Pu C. Lalrinsanga chuan a hlan a ni.

Lau lui MI Project hi JICA TCP hnuaia siam niin Contract works leh Community Works-a then a ni a. Contract works  hi Cheng Nuai 58.90 man hu niin M/s Excel Consultancy Services ten an thawk a. Anni hian an hna hi February Ni 26, 2019 atanga thawk tanin May ni 14, 2020 ah an thawk zo a. Community Works hi Water User Association ten thawkin March Ni 5, 2019 leh January Ni 30, 2020 chhungin an thawk  thung a ni.

Lau lui MI project ah hian Intak, Cross Drainage, Desiltation tank, Channel, Culvert, Maintenance of approach road, Causeway leh thil dang te a tel a. Project pumpui zawh nan hian Rs. 67.275 lakhs hman niin  sum  senso zawng zawng hi Japan International Cooperation Agency ( JICA) atanga hmuh vek a ni.

JICA India hian ei leh bara Mizoram kan intodelh nan Agriculture lamah Kum 20 chhung atana Master Plan an duang tawh a. He lau lui MI Project pawh hi he master plan aṭanga siam niin Farming system thar a luhpui tura duan a ni.

Lau Lui MI Project hringtu JICA hnuaia Technical Cooperation Project chu hun engemaw chen kalpui a nih hnuah a lo tawp hnai tawh a. He Project atanga chhunzawm tur lo neihdan kalhmang thar JICA Farming System ( JIFAS) chu kalpui chho turin tunah hian JICA leh Mizoram Sawrkar chuan ruahmanna an kalpui mek a ni. JIFAS hnuaiah chuan Line Department hrang hrang ten CSS an hmuh ang te hmang tangkaia Convergence siamin JICA Technical Cooperation Project hnuaia hmalakna angin  farming system tha zawk leh changtlung zawk, intodelhna kawng zawh tura hmalak a ni dawn a ni.

He hunah hian Khuallian Irrigation and Water Resources Minister Pu C. Lalrinsanga chuan thu sawiin hun engemaw chen JICA hnuaia Technical Cooperation Project kalpui a nih hnuah a project hmawr bawk theia kan awm hi a lawmawm hle a ni a ti a. JICA India hnenah pawh Mizoram Sawrkar aiawhin lawmthu a sawi a. He project hnuaiah hian hna tam tak thawh niin Capacity Building lamah Japan thiamna hmanga thiamna thar tam tak zirchhuah a ni bawk a, kan hlawkpui hle a ni, a ti. Japan mithiamten Mizorama hna an rawn thawhdan leh an hnaa an rinzawm zia te, an tum a ruh zia te leh ruah leh nisa in an hna a tih khaihlak ve ngai loh zia hi kan entawn tur a ni, a ti. Japan ho te nen kan hmel leh kimtlang a inang viau a, hmasawnna kawngah erawh kan inthlau  hle si hi a chhan bulpui ber chu kan rilru puthmang inang lo hi a ni. Japanese te hmasawn chakna hi an rilru ah a inṭan a, chu chu kan tih ve tur hmasa ber a ni a ti.

Minister chuan JICA hnuaia Lau lui MI project kan nei thei hi a lawmawm a, State Sawrkar pawhin Collective farming policy a kalpui chhunzawm dawn bawk a. Infrastructure kan mamawh ang te kan neih hi a tawk lo, kan rilru hian hmalam a thlir tur a ni a, kan work culture kan her dik tur a ni. Chumi a nih si loh chuan hmsawnna rulrel ngah viau ringawt hian awmzia a nei lo palh thei  a ni a ti. Minister chuan Mizoramin OP12 Bio fertilizer kan siamchhuak tan a, tunah hian loneitute tan kan rawn chhawpchhuak thei tep tawh a ni a ti bawk.

Khual zahawm Pu Saito Mitsunori, Chief Representative, JICA India pawhin thu sawiin India ramah hian loneitu tluk leh dingawn khat dawn mai an awm a, anni ngaihtuah hi tih makmawh a ni, a ti a. Mizoramah pawh loneitute dinhmun chawikan hi in damna tur a ni tih kan hria a, JICA chuan kawng hrang hrangin state sawrkar nen hma kan la a ni, a ti. Tunah hian JICA in Technical Cooperation Project kan kalpui chu Mizormah chuan a lo tawp dawn ta a, thiamna leh kalphung kan duansak che u leh hmanrua leh ralthuam kan hnutchhiah che u hi a hmangtu kutah a innghat ta a ni tiin Loneitute a fuih a ni.

An kuta he project hlan a nih avanga an lawmthu sawiin Charpui Water User Association, Lau Lui Chairman Pu R. Vanlalhriata pawhin thu sawiin kum 2007 aṭang tawh a Japan mithiam JICA hmalakna hrang hrang dawngtu an ni chu Sawrkar chungah leh JICA chungah an lawm tak meuh a ni an ti a. Tuna tuikawng ṭha an neih tak avanga tharchhuah kawngah pawh hma sawn ngei an tum thu an sawi a ni.

Loneitute kutah Lau Lui MI Project hlanna  hi Irrigation and Water Resources Secretary Pu J. Hmingthanmawia, IAS in a kaihruai a. Pu Saito Mitsunori, Chief Representative, JICA India chu Khual Zahawm ani a. Er Lalrotluanga, CE, I&WR chuan Technical report pe in Er H. Piangthanga, EE Aizawl Division, I&WR chuan lawmthu sawiin hun hnung a khar a ni.