1399/2023-2024

Lunglei; the 7th August;2023: Vawiin chawhma dar 10:30Am khan DC Conference Hall-ah District Bawrhsap leh Chairman District Task Force on Immunization ni bawk Pi Ramdinliani IAS chuan Hridanna beihpui thlâkna – (Intensified Mission Indradhanush IMI 5.0) chu Lunglei district a kalpui tan ve turin a tlangzarh.

Mission Indradhanush hi kum 2015 April atang khan lo tan tawh a ni a. Sawrkarlaipui hmalakna niin, Mizoramah pawh District tinah neih tur a ni. Nu Naupai leh naupang kum 5 hnuailam zawng zawngin hridanna an lak kim vek theih nana hmalakna a ni.

Hri laka invenghim tur chuan, a vei awlsam (Nu leh naupangho) hian an kum mil zela an lak tur ang an la kim vek tur a ni a, an lak Kim hma loh chuan hetiang beihpui hi a kal zel dawn a ni.

Measles leh Rubella natna te hi Mizoram chhûngah a awm reng a, natna lanchhuah dân nasa ni lo mahse a hnu-a harsatna(Complication) hrang hrang thlen thei a ni. He natna pahnih(2) te hi Vaccine hmanga invên theih anih avângin India sorkar chuan tun kum December 2023-ah hian Measles(Sentût) leh Rubella natna chu ûmbo tûra ruahmanna a siam bawhzuiin vawiinah hian beihpui thlak hawnna Programme hman a ni.

He natna pahnihte ûmbo tûr leh natna hrang hrang hridânna dawng thei nu naupai leh naupang zawng zawngin an dawn ngei theih nân India sorkâr chuan Hridanna beihpui thlâkna – Intensified Mission Indradhanush 5.0 chu kumin August, September leh October thlaa kalpui tûrin ruahmanna siam in, Health Dept. Mizoram pawhin he beihpuithlak hi Mizoram pumah kalpui turin a in buatsaih mek a ni.

He beihpui thawhkhatna hi Mizoram khaw 190-ah neih tur a ni a. Lunglei district-ah chuan Tlabung SDH hnuaiah khaw 23-ah te, Lungsen PHC hnuaia khaw 7 ah te, Bunghmun PHC hnuaia khaw 9 ah te leh Hnahthial CHC hnuaia khaw 1 ah te neih tur a ni.Thawhkhatna hi August ni 7-12 inkarah neih tan tur a ni a, thawhhnihna hi September 11-16 inkarah, a thawhthumna hi October 9-14 inkarah neih tur a ni.

Vawiin a Hridanna beihpui thlak tlangzarhtu Pi Ramdinliani chuan  Hridanna hrang hrang Sawrkar laipuiin a thlawn a min lo pek hi Rs.35,000/- hu vel lai a ni a. Kan tana awlsam taka lak theih a ni lai a kan lo lak ve hi kan mawhphurhna leh tihmakmawh a ni. Kan  district a lo hrisel  zâwk nân, nu naupai leh naupang zawng zawngte, an kum mila lâk tûr hridanna la theuh tûrin a chah hlawm a ni.