1398/2023-2024

Aizawl, the 7thAugust 2023: Governor Dr Hari Babu Kambhampati chuan vawiin khan Raj Bhavan-ah Padma Shree dawngtu Pu C.Kamlova a kawm a. He hunah hian Mizoramah Hindi zirtirna chak zawka kalpui theih dan tur an sawi a ni.

Governor Dr Hari Babu Kambhampati chuan Pu C.Kamlova thawhhrima leh Hindi zirtirna kawnga hma a lo kak tawh na te chu fakawm a tih thu a sawi a. Mizoramah kan thalai ten Saptawngah harsatna an neih loh lain Hindi tawngah erawh hmasawnna tur an nei nia a hriat thu a sawi a ni. Governor chuan Mizo thalaite hian theihna sang tak an nei a, an thiamna te behchhan hian India ram khawi hmunah pawh eizawnna tha tak tak an hmu thei nia a hmuh thu sawiin Hindi tawng erawh an thiam tel tha a tih thu a sawi bawk a ni. Governor chuan Mizo thalai te zingah Hindi tawng thiam chak tam tak an awm chu vanneih thlak a tih thu a sawi a. State thenkhatah te chian Hindi tawng zir duh lo leh dodaltu an awm lain Mizo thalaite chuan Hindi thiam pawi an ti lovin a tangkaina an hria tih a sawi a ni.

Governor chuan Pu C.Kamlova hnenah hian tun dinhmuna sikul naupangte hnena Hindi zirtirna kalpui dan te a zawt a. Hindi Prachar Sabha hmalakna te pawh a zawt tel bawk.  Pu C.Kamlova chuan Governor in Hindi zirtirna uar tura hmalakna kalpui a duh chu thil  phurawm tak a ni tih a sawi a. Tunah hian sikulah te Hindi zirtirna  tha taka kalpui a nih rualin mipui nawl puiin Hindi an zirna tur atan chuan hmalakna thar a ngai niin a sawi a. Hemi chungchangah hian Proposal siam a nih tawh thu sawiin chu Proposal chu Mizoram sawrkar pawhin a pawm tawh a, tunah hian NEC hnenah Art & Culture Department in a thawn tawh tih a sawi. He proposal ang chuan Hindi zirna turin lehkhabu buatsaih a ni dawn a, lehkhabu hi a thlawnin school, NGO te leh a duhtute hnenah sem torah ruahman a ni a ti. Kumtin  NEC hnuaiah hian India hmarchhak huam chhunga Hindi zirtirna atan Sum dahhran a ni a, chumi behchhan chuan he proposal hi siam a ni tih a sawi bawk. Hindi zirtirna atan proposal, Mizoramin a NEC a thehluh  tak chu pawm a nih theih na turin Governor chu hma la turin a ngen nghal bawk a ni.