Vawiin chhun dar 12 : 00 khan D.C’s Conference Hall, Siaha-ah Superintendent of Police, Siaha District, Siaha huaihawt in “ Launching Programme of Night Patrolling Plan in Siaha Town” tih chu neih a ni.
He Programme hi Pu S.D. Mishra IPS, Superintendent of Police chuan a kaihruai a, he Programme hi neih a tul chhan te sawi fiah in Siaha khawpui chhunga pawikhawihna leh sualna chi hrang hrang te zirchian hian rukruk leh inrawknate a tam ber thu sawiin inrawkna hi nikum 2015 leh kumin 2016 khaikhin chuan 74-75 % ah a pung a ni tiin zirchian-na a a lan dan chuan 61% chu Zan a thleng thin a ni a, 11% chu Chhun a thleng thin niin 9 % chu chawhnu a thleng thin niin 12% chu thimhlim a thleng a nih thu a sawi a, pawikhawihna thleng 66 % vel chu Siaha khawpui chhung veng hrang hrang Council Vaih,College Vaih, Siahatlah, New Colony, New Siaha West, Meisatla-II, New Siaha East-I leh Siaha Vaihpi a thleng thin a nih thu a sawi a, an thil ruk langsar zualte chu Pawisa fai, Electronic bungrua, Ei chawp, Gas Bur leh Mobile Phone te an nih thu a sawi bawk. Heng pawikhawihna thleng thin te hi theih ang anga an beihlet zel thu leh Pawikhawih chingte chungchang ziahna bu “Dossiers” pawh an siam thu sawiin he Record bu ah hian pawikhawih thinte hming an thiante hming Address kimchang leh an pawikhawih thindan kimchangte ziah lan a ni. Zan lamah hmun pawimawh zualbikah te Patrolling neih thin a nih thu leh Picket Checking pawh neih anih thin thu a sawi bawk. Naupang rual ruk ruk chingte pawh manchhuah a ni tiin thubuai 7 lai siamsak an nih tawh thu a sawi a, Thubuai ziahluh zawng zawng zinga 75 % chu chhuichhuah niin an thilruk pawh 85 % vel hmuhchhuah a nih thu a sawi bawk.
Zan lama Police Patrolling Duty te hman tur Motor te chi pakhat leh Motorcycle pakhat ruahman a ni tiin heng Motor te hi District Bawrhsap Pi Harleen Kaur IAS chuan Flag in a vailiam a ni. Zan lama Police Duty tur te hi Mobile leh WT Set te paitir an ni a, Social Media lamah pawh Police te nen thil inhrilhfiah nan Facebook Group “Siaha Police” tih leh Whatsapp “Siaha Police & Public” tih Group siam tawh a ni a ti bawk. VDP leh khawtlang Hruaitu te nen pawh a huhova hmalak tum mek a ni tiin Siaha-ah mi thilruk ngaihtuah chiang lova lei mai ching kan awm chu pawi a tih thu sawiin heng mite hi manchhuah an nih chuan Dan anga thubuai siamsak an ni ang a ti a ni.
He Proramme ah hian District Bawhsap Pi Harleen Kaur IAS pawhin thu sawiin Sualna do tlang thei tur chuan mitin ten mawhphurhna kan nei a ni tiin Siaha Police ten theihtawp chhuah a misualte manchhuah tum a an bei thin avangin an chungah lawmthu a sawi bawk a ni.
He Programme ah hian zawhna leh chhanna hun te neih a ni a, Siaha khawpui chhunga pawikhawihna thlen thin dan Power Point Presentation hmanga entir a ni.
He Launching Programme ah hian Siaha khawpui chhung a Police te, Head of Department, Tlawmngaipawl hotute leh Chanchinthar thehdarh tute an tel kim hle a ni. Programme hman zawh hian Conference Hall kawtah He Launching Programme a hman tur Motor te chi pahnih leh Bike pahnih te chu District Bawrhsap Pi Harleen Kaur IAS, Pu N,Chakhai Addl D.C, Pu VL Hruaizela Khaingte, Project Director, DRDA leh Pu T.Chatlua President, M.T.P. General Headquarters ten an vailiam a ni.
