Vawiin  chawhnu dar 1:00 khan Aizawl North Main Centre huamchhung a awm Zemabawk YMA Hall-ah kum 2014-2015 chhung atana RSBY leh Mizoram State Health Care Scheme enrolment neih a ni.

He RSBY leh Health Care Scheme enrolment hawnna inkhawm hi Pi Liankhumi, CEO, Mizoram State Health Care Society in a kaihruai a. Pu R.Lalrinawma, Dy. Speaker chu Khuallian niin Dr.Lalbiakkima, Director, H&ME chu Khual zahawm a ni bawk.

He huna thusawitu Pu R.Lalrinawma, Dy. Speaker, Zemabawk bialtu MLA ni bawk chuan thu sawiin a bial chhunga RSBY & Health Care Scheme tih a nih theih nana thawktu te zawng zawng chungah lawmthu a sawi a. Pu Rinawma chuan " Inhmakhawsuih thiam lo kan nihna hi bansan a hun tawh a, a hunlaia thil tih thin hi thil tha a ni tih i hre thar leh ang u" tiin enrolment la ti ve lo te pawh hrilhhre zel turin kalkhawm mipuite a chah a ni.

He hunah hian Pi Liankhumi, CEO chuan RSBY leh Mizoram State Health Care Scheme awmzia mipuite hnenah chiang zawka sawifiahna hun a hmang a ni.

Mizoram-ah hian Kum 2010 atangin RSBY & Health Care Cheme hi kalpui tan a ni a. Hemi kawnga hnathawh that avang hian Mizoram State Health Care Society te chuan kum 2012 leh 2013 khan Outstanding Improvement leh Outstanding Performance Award  an lo dawng tawh a ni.  RSBY leh Mizoram State Health Care Scheme hi thil hran a ni a, RSBY chu Central Scheme, Rs.30 chauh senga enrolment tih theih niin Mizoram Health Care Scheme erawh Rs. 500 leh 700 senga in ziahluh a ni thung. RSBY leh Mizoram Health Care Scheme-ah hian hamthatna dawngtu mipuite hi sawrkar in a ngaih pawimawh ber avangin mipuiten thla la a enrolment va tih mai khan damlohna tawhin Rs.30,000 (singthum) man thlengin a thlawna sum hman theih a ni a. RSBY ah hian a tirah chuan BPL te tan chauhva enrolment tih theih ni mahse tunah chuan MNRGA Job Card neite leh khawlaia thil zual Street Vendor te tan pawh kawng hawn a ni tawh a. tunah hian mi nuai khat chuang enrol ni tawhin kum 2013 chhung khan damlo te tan sum cheng nuai 790 pek chhuah a ni tawh bawk. Kumin chhung atan hian March thla thleng RSBY & Health Care Scheme enrolment hi tih theih a ni ang.

Vawiina RSBY leh Health Care Scheme Enrolment-ah hian Zemabawk veng chhung atangin mi 500 chuang an inziak lut a ni.