Mizoram Law Commission Chairman Pu R.Lalrinawma chuan vawiin khan Sihphir-a Aizawl Forest Division Football Tournament 2009 a hawng a. Football Tournmanet buatsaihtu Aizawl DFO chungah lawmthu sawiin thalaite hmakhua ti chak tura Mizoram sorkarin theihtawp a chhuah tur thu te, Youth Commission tihlen leh tihchak te, Sports Budget atana Cheng nuai 500 pek belh a nih dan te bakah Sports Minister-in ‘Catch Them Young’ a kalpui chu district hrang hrangah chak taka chhunzawm zel a ni dawn a ti a. Ram hmasawnna atana thalaite kut tihchak chu Mizoram sorkar Pu Lal Thanhawla kaihhruai thupui ber pakhat a ni, a ti.

Law Commission Chairman hian Sihphir Vengthar YMA ten kum 2001 atanga an lo sak tan tawh, sum harsat avanga an puitlin theih loh Forest Dept. puihna avanga an peihfel tak ‘Green Room’ a hawng bawk a. Hetah hian Pu Rinawma chuan a bial chhung Sihphir Vengthar chu nungcha leh thing leh mau humhalh kawngah state pum huap hriat hlawh an nih tawh thu leh hei hi vawng nung reng turin a chah.