Ni hnih awh ‘Orientation Course for Civil Services aspirants’ chu vawiin khan zawhfel a ni ta. Civil Services Coaching Institute chu Mizoram Youth Commission leh Lord Krishna IAS Academy, New Delhi chuan March thla atang hian Gov’t. Aizawl College-ah buatsaih tan an tum a. Hetiang lama tui thalaite tana hriattur tul inzirtir lawkna chu February ni 24, 2009 atang khan I & PR Auditorium-ah neih a ni. He Coaching Institute din tur hi thalai lehkhathiam ten an ngaihven hle a; B.A., M.A., M.Phil leh Doctor te pawh in Orientation Course hi an chhim a, an phur hle nghe nghe a ni.

 

He Orientation Course ah hian Lord Krishna IAS Academy atangin Pu Ankur Agarwal, Director leh a thawhpui Pu Amit Kumar Singh te an lo kal a ni.

Mizoram Youth Commission hian Combined Defence Services, Bank Probationary Officers Exam, Staff Selection Commission, etc. hnuaia exam chi hrang hrang atan pawh Coaching changtlung tak buatsaih chhoh zel a tum a. Mizo thalaite tana dil awm chi hnaruak chi hrang hrangte pawh www.mycmizoram.net atangin download theih a dah zel a ni mek a, internet hmang thiam lote tan application form pawh Mizoram Youth Commission Office, Civil Secretariat Annexed I, Raj Bhavan bulah lak theih a ni.