Mizoram State Law Commission Chairman Pu R. Lalrinawma chuan vawiin khan a bial chhunga veng pahnih Zemabawk leh Zemabawk North tlawh in khawtlang hmasawnna tur mamawh hrang hrang khawtlang hruaitu te nen an sawiho.

Pu R. Lalrinawma chuan ram, khawtlang, chhungkua leh mimal hamthatna tur hna engemawzat sorkarin a thawh tawh rualin tul leh mamawh tihtur tam tak hmabak a la awm a ni, a ti a. A bial chhung veng thenkhat Municipal Area-a rinluh a nih tak avanga Rural Development hna tihtawp a nih tak thu sawiin khawpui chhung hmasawnna hna Municipal Area Development dawng chho mek tur an nih avangin he hun inthlak karah mipuite chu dawhthei taka sorkar hmalakna ngaichang turin a ngen nghal a ni. NLUP chungchang sawiin Pu R. Lalrinawma chuan rinawmna leh taimakna nena hlawhtlinpui ngei tura fuihin tanpuina dawn an nghakhlel ang bawkin sorkar pawhin a dawngtu te hlawhtling hmel hmuh a nghakhlel hle a ni, a ti a. Sorkarin a tum ber chu khua leh tui te thlamuanna leh hma sawnna ngaihtuah a ni tih sawiin Law Commission Chairman chuan mipui te himna tur dan mamawh tam tak duan a ni tawh a, Mizo hmeichhiate chawikanna tur dan mamawh te pawh buaipui mek a ni, a ti bawk.

Zemabawk-ah hian Local Council Chairman leh member te bakah tlawmngai pawl hrang hrang aiawh ten Zemabawk Community Hall-ah Bialtu MLA hi an lo dawngsawng a. An mamawh hrang hrang an thlen te zingah kawng siam chung chang te, tuihawk luankawr leh Retaining wall siam chung chang te, Aizawl-Lunglei Road a awm te tana PHE tui lak an duh thu te, LT Line Extension chung chang te leh Urban Health Center Zemabawk veng chhunga dah chung chang te a tel a. Zemabawk ‘N’ ah chuan khawtlang hruaitu leh tlawmngai pawl aiawh ten Pu R Lalrinawma hi Local Council House-ah kawmin an khawtlang mamawh hrang hrang te an lo thlen bawk. Law Commission Chairman tawiawmtu PHE, PWD, P&E, Health Department, Aizawl Municipal Council leh School Education aiawh te nen inpawh takin khawtlang hmasawnna tur an ngaihtuahho a ni.