Mizoram State Law Commission chu a Chairman Pu R Lalrinawma kaihhruaiin vawiin khan I&PR Conference Hall-ah a vawi 17-na atan an thukhawm a. Mizo inneih, inthen leh rokhawm thu-ah dan thar buatsaih chungchang an sawi ho a ni. He dan pathum duang chhin tur hian an member Pu RC Thanga leh Member Secretary Pu Zahmingthanga Ralte te ruat an ni a. An ni hi June thla ral hma azo tura beisei an ni a, inrawnkhawm ngai te neih a nih hnu-ah a rang thei ang bera Assembly a putluh tura hmalak nise an ti.

Mizoram State Law Commission hi member 7 neiin April ni 21, 2009 khan din a ni a. Pu R. Lalrinawma, MLA chu Chairman niin Member-Secretary-ah Pu Zahmingthanga Ralte, Dy. Secretary, Law & Judicial Deptt. ruat a ni. June ni 2, 2011 khan Member 3 ruat belh niin tunah hian Chairman leh Member-Secretary te nen an vaiin mi 12 an ni mek a ni.

Mizoram State Law Commission hian a din tirh atanga hma chak taka la nghalin hlawhtlinna hrang hrang a lo nei tawh a. ‘The Scheduled Tribes and Others Traditional Forest Dwellers (Recognition of Forest Rights) Act, 2006 (Central Act No. 2 of 2007)’ leh The Gram IMyayalayas Act, 2008 (Central Act5. No. 4 of 2009)’ chungchang State Law Commission-in a zirchianna leh Mizorama hman a nih theih nana rawtna an siam (Report No. 1) chu March ni 17, 2010-a Mizoram sorkarah an thehlut a, Mizoram Legislative Assembly-ah pawh pawm tawh a ni. January ni 13, 2012 khan Orders u/s 144 Cr.P.C. hman sual theih chungchangah tun aia awmze nei zawka u/s 144 Cr.P.C. hman a nih theih nana rawtna (Report No. 2) chu Mizoram sorkarah an thehlut tawh a; hei bakah hian mi hla/zai/video leh a dangte dan lo va lo copy chhawn a awm loh nan State Law Commission chuan rawtna a siam chu Home Deptt. ah thlen a ni tawh bawk a, hei hi Home Department hian chak takin a bawh zui a ni.

State Law Commission hian ‘Application of Various Laws in the State of Mizoram’ chungchanga inrawnkhawmna leh sawihona hun chu April ni 23, 2010 khan Aizawl-ah leh April ni 29, 2010 khan Lunglei-ah te a buatsaih a. Mizoram tana Dan siamthat ngai nia hriatte chu a kaihhnawih Department-ah te thehluh a ni. Mizoram-a Insurance Company awm ten lirthei neitu ten an Insure dawna duh an thlan theihna an lo dal thin nia sawi chungchangah ‘The Motor Vehicles Act, 1998’ tlawhchhanin lirthei nei ten an duh chuan First Party leh Third Party hmanga an lirthei an insure theih avangin, hemi chungchang hi a tul anga lo bawhzuia hma la turin Transport Deptt. ah a thlen tawh bawk. Picnic Spot leh Swimming Pool hmangtute tana himna dan The Mizoram Swimming Pool Regulation Bill, 2011' chungchangah he Dan hi hman a nih thuai theih nana hmala turin Local Administration Department hnenah hriattir tawh a ni a. Hmingthlak/Hming siamthat (change of name by way of Affidavit) chungchangah State Law Commission chuan thil felhlel a awm nia thu a dawn pawh bawhzuiin dik tak leh fel taka hmingthlak/hming siamthat hi kalpui a nih theih nana hmala turin Mizoram sorkar-a GAD (General Administration Derpartment) ah an thlen tawhin Affidavit awmzia mipui ten an hriat theih nan a zirtir chhawng leh tu tur Central YMA aiawh te zirtirna an lo pe tawh bawk.

 Mizoramah Special Juvenile Police Unit din tura rawtna lo lut chu State Law Commission chuan a bawhzui nghal a. Mizoram chhunga Police Station tinah Special Juvenile Police Unit din tura hma la turin Home Department-ah a thlen a. Home Department hian theihtawpa bawhzui nghalin tihhlawhtlin tawh a ni. Environment & Forest Department, Mizoram-in Mizoram-a hman turin The Indian Forest Act, 1927 (Extension of Mizoram) Bill, 2012' an draft, State Law Commission chul mam tura an pek chu uluk taka an thlirho hnu-in State Law Commission chuan The Indian Forest Act, 1927 (Extension of Mizoram) Bill, 2012' en chungin The Mizoram Forest Act, 1955' behchhana The Mizoram Forest Act’ siam tha zawka an hriatthu hi E&F Deptt. ah an hriattir a ni.