Vawiin chawhnu khan Assembly Speaker Pu R. Romawia chuan Chaltang North, Lily Veng-ah Health Clinic Sub-Centre a hawng. He programme hi Pu H.T. Rualthankhuma, Vice Chairman Local Council chuan kaihruaiin Upa K. Zaluta chuan hunserh a hmang.

Pu R. Romawia chuan Chaltlang North mipuite tan tangkai taka an hman tur Health Clinic Sub-Centre hawn a ni ta chu lawmawm tiin heng centre te hi nu naupai lai leh naupang kumkhat hnuailamte hriselna lama enkawlna hmun pawimawh tak a nih mai bakah hriselna kawnga inzirtirna leh inhrilhriatna hmun pawimawh tak a ni a ti a. Veng chhunga hmasawnna tur kawng tam tak an la neih thusawiin hengah te hian khawtlang lungrual a tul a, lungrual leh tanlak chuan kawng a awm thei zel a ni, a ti bawk.

Health Clinic Sub Centre hawn a nih theih nana an hmalak dante Pu R. F. Zauva Member Secretary Local Council chuan a sawi a. He hunah hian Aizawl East, Chief Medical Officer (CMO) Dr. L. T. Tluanga pawhin thu a sawi bawk a ni.