Vawiin 1^st May 2013 khan Pu Lal Thanhawla Chief Minister Mizoram leh Dr. Montek Singh Ahluwalia, Deputy Chairman Planning Commission te chuan Mizoram Annual Plan 2013-14 chu Rs 2500.00 crore   ni turin an sawifel. Nikum 2012-13 Annual Plan approved tawh Special Road Development Project atana Rs 200.00 crore Ministry of Finance in a release loh avangin Annual Plan nikum aia a punna hi 19.05 % a ni. Hemi bakah hian nikuma Minor Irrigation Scheme atana approve tawh Central sawrkar in a release loh avangin min sutpui tur leh World Bank Project leh JICA Project pawh nawrpui turin Deputy Chairman Planning Commission chuan Mizoram Chief Minister a tiam bawk a ni. 

NLUP atan beneficiaries 15000 belh chhah tura Pu Lal Thanhawla ngenna pawh tuna kal mek ang bawk a rei lo te chhunga Cabinet approval la a chinfel nghal a tiam bawk. Hei hi tuna Rs 2500.00 crore min pek tawh belhchhahna tur a ni.

Mizoram tui harsatna chungchangah Rain Water  Harvesting awmze nei zawk a kalpui dan ruahmanna min siampui turin Team of Expert te Dr J.S Samra CEO National Rainfed Authority of India hovin Mizoram ah an lo kalthuai bawk ang.

Pu  Montek Singh Ahluwalia chuan Mizoram sorkar hnathawh leh hmalakna te chu a lungawi thlak hle a ni, a ti a. Agriculture, Zirna leh Hriselna lama hmalakna te pawh a fakawm hle a ni, tiin NLUP kalpui mek in hlawhtlinna hmuh tur a awm chho zel chu a lawmawm a, kalpui zel anih theih nan kan thlawp zui zel ang, a ti. Kawlpetha lakluhna kawnga hlohna awm thin chu enfel  tul a tih thu sawi bawkin, kawngpui siam hna pawh chak zawka kalpui a tul thu a sawilang bawk a. Sector hrang hrang Industry te, AH & Vety te, Horticulture leh department dang pawimawh tak takte tih chak ngai a tih thu a tarlang bawk a ni.

 Chief Minister hi Pu R.Lalzirliana Home Minister leh Official pawimawh ten an tawiawm a ni.