Vawiin chawhnu khan Mizoram State Law Commission member-te chu an Chairman, Pu John Siamkunga, MLA hovin a office chamber, New Secretariat Complex, Aizawlah an thukhawm a. Tun tum hi he Commission thutkhawm vawi 34-na a ni.
Vawiin thutkhawmah hian thildang bakah Mizoram-in Assembly a neih 1972 atanga Dan siam hrang hrangte enfel a ni a. Dan engemawzat chu a changtu Department te hnenah nuai bo (repeal) turin rawtna a siam a. Dan 24 chu siam that ngai a awm avangin a changtu Department hrang hrangah hma la nghal tura hriattir nise tiin an rel.
Chairman, Pu John Siamkunga chuan Commission member-te inpekna leh phur taka Mizoram tana an thiamna leh finna an hmang thin chu lawmawm a tih thu sawiin, hei vang hian Commission pawhin hna tha taka a thawh thin thu a sawi bawk.
He meeting-ah hian Commission Secretary, Pu Zahmingthanga Ralte chuan Mizoram State Law Commission din a nih atanga hmalak tawhna hrang hrangte a report a. Pu Zahmingthanga Ralte-in report a pek dan chuan Mizoram State Law Commission term hmasa ber chu ni 21.4.2009-ah hawn niin, theihtawpin hna a thawk nghal a. Law Commission hmalak tawhna hrang hrang langsar zual a tarlan zingah hengte hi a tel –
March ni 17, 2010 khan Mizoram sorkarah Report hmasa ber chu thehluh niin Report No/l-ah hian pakhatna chu The Scheduled Tribes and Other Traditional Forest Dwellers (Recognition of Forest Rights) Act, 2006 (Central Act No.2 of 2007) a ni a, hei hian forest area-a chengte tana hamthatna chi hrang hrang a keng tel a; sorkar pawhin a hlawhtlin theih nan chak takin a bawhzui nghal a ni. Pahnihna chu thingtlanga thubuai hla buai te awlsam zawka chinfel a nih theihna tur The Gram Nyayalayas Act, 2008 (Central Act No.4 of 2009)' niin, sorkar pawhin a hlawhtlin theih nan theihtawpin hma a la zui a ni. January ni 13, 2012 khan Law Commission chuan Mizoram sorkarah Report vawihnihna a thehlut leh a. Report No. 2-ah hian Mizoram chhunga Section 144 Cr.P.C. hmanga District Magistrate/Deputy Commissioner ten Order an chhuah tam lutuk leh Section 144 Cr.P.C. hmang lo va Dan tlawhchhan tur a awm leh awm loh chian hmasak a tul thu te, Dan dinglai a awm reng laia Section 144 hmanga khapna thupek siam pawi theih dan te tarlan a ni. Mizoram sorkar pawhin hei hi bawhzui nghalin tunah chuan tul bik te-ah chauh Section 144 Cr.P.C. hmanga Order hi chhuah a ni ta a ni. Hei bakah hian Law Commission chuan kum 2011 khan 'The. Mizoram Swimming Pool Regulation' chungchangah concern Department-te hmala tura ngenna a pe tawh bawk.
'Affidavit' hman khaw loh chungchangah Law Commission chuan hma a la a. Affidavit hman khaw loh avanga ram leilung fate dikna leh chanvo chhuhsak a nih theih dan te, nakin zelah ram leilung fate tana thil tha lo zawk thleng thei a nih avangin Affidavit hmanga saphun te pawh a theih loh dan te Law Commission hian mipui te a lo hriattir tawh bawk a, Circular pawh Mizoram sorkar Department hrang hrangte tan a lo chhuah tawh bawk. Hemi chungchang hi sorkar pawhin theihtawp a bawhzuiin, a hlawhtling chho mek niin hriat a ni. Law Commission hmalakna-in Mizoram Assembly chuan 'The Mizo Marriage, Divorce and Inheritance of Property Act),2014' chu a lo pass tawh bawk.
