District Legal Services Authority (DLSA), Champhai chuan vawiin ni khan Law Day an hmanga, he ni pual hian  Champhai District Hospital-ah a duh apiangte tana hman theih turin thisen an pe.

Pi Lalrochami Ralte, Chief Judicial Magistrate & Secretary, District Legal Services Authority chuan dan hmanga roreltu an nih mai piah lamah  vawiin hian Law Day pualin midangte tana thisen hlu tak pe a  luanchhuahna hun an hman thu a sawi a.  Midangte tana malsawmna nih a hlut thu sawiin, sawrkar kaltlanga mipuite hnena rawngbawl thinte tan chona nise a duh thu leh midangte'n chhunzawm ve zel se a duh thu a sawi bawk.

Thusawitu dang Dr. R. Lalrinmawia chuan Champhai District Hospital-in thlakhatah thisen Unit 80 atanga 120  a mamawh thin   thu a sawi a.  Thla tin District Hospital-in thisen a mamawh a san ve zel avangin a thlawna thisen pek kawnga mipuite kan thanharh zel a ngai a ni, a ti a.  Mi tlawmngaite thisen pek khawl hmangin mi tam tak nunna chhan a lo nih thin tawh dan tarlangin,  District Legal Services Authority te'n phal taka a mamawh apiangte hman tura an thisen a thlawna an pe chu lawmawm tiin, midangte zirtir kawnga thawk chhunzawm zel turin a ngen nghal bawk a ni.

District Legal Services Authority  hian kum dangah chuan Law Day pualin Legal Awareness Campaign School hrang hrangah an nei thin a, kuminah hian a vawi khatna turin Law Day pualin thisen an pe a ni. Mipa 8 leh Hmeichhia 2 ten  thisen Unit 10 an pe a ni.