Mizoram School of Photography leh Photography Club of Mizoram buatsaih, MSP Photographic Salon vawi 2-na chu vawiin khan MSP Gallery, Upper Republic ah Sports & Youth Services Minister Pu Robert Romawia Royte in a hawng.

Photographic Salon hi a duh apiang tel theihna, thlalak intihsiakna leh pho lanna a ni a. Tun tumah hian mi 53 hnen atangin thlalak 127 a lut a, Colour Section leh Monochrome Section ah te thenin heta a titha ber hnenah Award sum fai Rs.10,000/- leh Trophy pek ve ve an ni ang a. Hei bakah hian thlalak tha 15 thlan chhuah te chu Gold Award, Silver Award leh Bronze Award te pek an ni bawk ang.

Khuallian Pu Robert Romawia chuan tunlai khawvel nunphunga bet tlat chu thlalak a ni, tiin IT hmasawnna thang zelah sawrkar pawhin thlalak tel lo chuan hna a thawk hlei thei tawh lo, a ti a. Hmasawnna hna atana DPR buatsaih leh hnathawh zawh tawh tih chian nan pawh thlalak a tel zel a ngai tawh a ni, a ti a. Hetianga thlalak pho chhuah leh intihsiakna hi chhunzawm zel a, zau zawka hmarchhak leh India ram pum huapa mite an lo tel theihna tura buatsaih chhoh zel a pawimawh thu sawiin Photography chu a tha zawnga ram hmel pho lan nan hmang tur leh a ti hmasawn zel tura tanla sauh sauh turin a chah a ni.

Pu Robert Romawia chuan  social media ah tawngkam dengkhawng leh mawilo tak tak hmang duh mithiamte zingah pawh an la awm chu pawi a tih thu a sawi a. Mite chet chhiatna leh an mualpho theihna tura thlalak leh chanchin thehdarh chin te hi danin a phal loh, thubuai rip tak awrh theihna a nih avangin professional photographer te chu hemi kawngah hian fimkhur turin a chah bawk a ni.

Photographic Salon hi khawvel huapa thlalak lama intihsiakna, National/International Contest an neih thin dan zulzuia buatsaih thin a ni a. Photo Exhibition leh Contest hian November ni 30 thleng a awh dawn a, nitin chawhma dar 10 atanga zan dar 8:30 thlengin tlawh theih a ni a. Thlalak phochhuah te hi Exhibition neih chhung hian tlawm zawka lei theih a ni bawk ang.