Law & Judicial department chuan a hnuai ami ang hian thuchhuah an siam:

Mizoram Sawrkar chuan Corruption dona atan The Mizoram Lokayukta Bill, 2014 chu duang felin Mizoram Gazette Vol.XLIII Issue No.398 dt.5/8/2014 ah chhuah a ni a, Law & Judicial Department Website www.landj.mizoram.gov.in ah dt.20.8.2014 atangin upload a ni bawk a. Hei hi helama tui mi leh mipui nawlpuiin an ngaihdan te an thawh theihna tura hmalakna a ni a.Central leh State Sawrkar tam tak pawhin tul bik an tihna thil ah chuan hetiang hian hma an la thin a ni. Thuhmahruaia ziahlan a nih angin mi tupawhin rawtna emaw sawiselna an neih te Gazette chhuah ni atanga thla khat (1) chhungin Secretary, Law & Judicial Department hnenah thehluh theih a ni a. Hengte hi Sawrkar-in uluk takin ala zirchiang leh dawn a ni.

Central Sawrkar dan siam the Lok Pal and Lokayuktas Act, 2013-in a phut angin Mizoram State pawhin Lokayukta Act hi January 2015 aia tlai lova kan neih ve tula kan hriat avangin muangchang taka kal theih a ni tawh lova. Dan siam dawn reng rengin thil tam tak zingah India Constitution a kalh em tih te, dan dinglai a kalh em tih te, dan duan dan phung pangngai (legislative drafting technique) a zawh em tih te en a ngai a. Heng kan sawi tak-huang pawnah hian duh hawi zawng zawnga dan duan chu thil fello leh pawi thlen thei thil a nih zawk avang leh tih thin dan ngai a ni lo tih mipui kan in hriattir a. Corruption dona hmanrua te ang dan phei chu uluk leh fimkhur taka duan ngai chi a ni. Sawisel tur nei emaw rawtna nei emaw chuan a thlenna tur dik takah thlen Law Department chuan kan inhawng reng a ni tih hriattirin kan sawm a ni.