1660/2023-2024

Aizawl, the 25th August, 2023: Govt. Mizoram Law College din champha vawi 40-na, Ruby Jubilee lawmna hun Legal Chamber, Govt. Mizoram Law College, Luangmuala hman chu vawiin khan Law & Judicial Minister Pu T.J. Lalnuntluanga chuan khuallian niin a hmanpui a, Souvenir tlangzarhin jubilee lungphum a hawng nghal bawk.

Khuallian Law & Judicial Minister Pu T.J. Lalnuntluanga chuan Govt. Mizoram Law College-in kum 40-na hmel a hmu chu a lawmpui thu sawiin, tun hun thleng thei tura theihtawp thathawhtute fakawm a tih thu a sawi a. Govt. Mizoram Law College chu Mizo te'n dan leh hrai kan hriat theih nana thawhhlawk tak a nih thu tarlangin, heta tang hian Lawyer leh Judge chhuanawm tak tak an lo chhuak tawh a ni, a ti a. Zirlaite chu midangte tana malsawmna nih tum tlat tur leh mi rethei leh hausa inkar zau tak tizim tura theihtawp chhuah turin a chah a. Kan ramin hnasawnna leh changkanna kawngah ram changkang zawk leh upa zawkte a um ve mek zel thu sawiin, hetih mek lai hian duhkhawp lohna a awm chang pawhin rilru leh ngaihtuahna hrisel pu tlat tur leh ram hruaitute sawisel mai lova finchhuahtu nih tum turin a chah a. Social media hman chintawk nei tur leh inhuatna siam thei angte tarlang lo turin a fuih a. Tumruhna leh taimakna nena lehkha zira hlawhtlinna an chan hnuah pawh midangte tanpuitu, biak nuam leh hawihawm ni tlat turin a chah bawk.

Pu T.J. Lalnuntluanga chuan thalai la naupang tak tak zingah rilru lama harsatna depression/anxiety nei an tam lutuk chu veiawm a tih thu sawiin, thalaite chu lehkha zir mai bakah zirlai tibahlah lova kohhran leh khawtlanga inhman nachang hre turin a chah a. Kan ramin a mamawh chu mithiam chauh ni lovin mithiam rilru hrisel pu a ni a, hemi tur hian kan nun kan uluk pawh a tul hle a ni, a ti bawk. Dan hre mi te chu miten dan hnuaia an chanvo dik tak an hmuh theih nana hmalak saktu an nih thu sawiin, dan hriatna a dik lo zawnga hman erawh harsatna thlentu a nih thu a sawi bawk. Tanpui ngaite rilru dik tak pu chunga tanpui zel tur leh tha leh dik nia an hriatah huaisen taka ding turin a chah a; dik lo nia an hriat chu hamthatna beisei lova hnawl ngam turin a fuih a. Nakin lawka roreltu dinhmun la chelh mai thei tur Law College Zirlaite chu mitinin dan hnuaia an chanvo dik tak an hmuh theihna tura rorel tum turin a chah a. Mizo zinga Supreme Court Judge kan la awm loh avangin hetiang thlengpha thei tura tan la turin a chah nghal bawk.

He hunah hian Pi Esther L.Chhangte, Principal, Govt. Mizoram Law College-in kalkhawmte lawmna thu sawiin report a pe a. Prof Rualkhuma Colney, Ex-Principal leh sawm bikte atangin thusawi ngaihthlak a ni a. Pi Rebecca Lalrindiki, Asst. Professor-in lawmthu sawiin  hun hman a khar a ni.

Mizorama Law College hmasa ber Aizawl Law College chu August ni 25, 1983 ah din niin, hemi ni vek hian Zofate tana ni chhinchhiah tlak tak Law class hmasa ber chu JL High School, Khatla tuna Govt. JL Higher Secondary School lo ni taah hian neih tan a ni. Pu Saingura Sailo chu Principal hmasa ber a ni. September ni 7, 1983 ah kha tih hun laia Chief Minister Brig. Thenphunga Sailo in Aizawl Law College hi a hawng a ni.

July ni 31, 1996 ah Liandingpuia Law College a lo ding ve leh a, September ni 14, 1996 ah kha tih hunlaia Chief Minister Pu Lal Thanhawla'n a hawng a, State Sawrkar hmalaknain heng Law College 2 te hi Aizawl Law College Registration hmangin kum 2004, July ni 1 ah chhunfin (Amalgamate) an lo ni ta a. A hming atan Mizoram Law College tih a lo ni ta a ni.

Kum 2006, August ni 25 ah Deficit grants-in-aid status-ah hlankai niin, Deficit College a nih angin State Sawrkar-in Governing Body Member tur kum 2 chhung zel atana a ruat ten College hi an enkawl thin a ni. Mizoram Law College hian Mizoram University hnuaiah Permanent Affiliation neiin, UGC recognized Institution niin, 2(f) and 12(B), UGC Act, 1956 hnuaia Grant dawng theite zingah tel vein, UGC (NERO), Guwahati atanga College tih changtlunna tur building grant a dawn atangin Women's Hostel pawh din a ni. Kum 2013, September ni 19 ah Provincialisation hmuin Govt. Mizoram Law College tih a ni ta a. Kum 2019 February-ah a vawi khatna atan NAAC Accreditation Inspection hmachhawnin, hetah hian 'C' Grade hmuin Accredited College a lo ni  ta a ni.

Tunah dinhmunah hian Zirlai 187 awm mekin, mi 700 chuang laiin LLB degree an lo nei tawh a. Faculty 9, Administrative Staff 13 leh Library Staff 3 ten Law College hi an enkawl mek a ni.

Vawiin Govt. Mizoram Law College Ruby Jubilee lawmna hunah hian Law College thawktu leh zirlaite bakah Higher & Technical Department hotute, Govt. Mizoram Law College a sulsutute, Governing Body member lo ni tawh te, Ex-Faculty-te bakah Zirlai pass chhuak tawhte an tel a ni.