1661/2023-2024

India ramin zalenna kum 75-na lawmna Azadi Ka Amrit Mahotsav (AKAM) kal zelah vawiin khan Social Welfare & Tribal Affairs Department, Women & Child Development Department leh National Commission for Women tangkawpa buatsaih 'Training of Government Officials on Gender Budgeting' chu Aijal Club Conference Hall-ah SW&TA Minister Er. Lalrinawma'n a hawng.

Training hawnna inkhawm SW&TA Addl. Secretary Pi Donnie kaihhruaiah Khuallian Er. Lalrinawma chuan 'Gender Budgeting' chu hmeichhia leh mipate - khua leh tui zawng zawngte tana tih bik nei lova an mamawhna zawn zela an hamthat tlanna tur chungchang a ni a, hmasawnna rah tha hmeichhia leh mipaten intluktlang taka an chan theih nan Sawrkar chuan Gender Budgeting hi hmanraw tangkai leh thil tithei tak ni tura a ngaihte zinga mi a ni a ti. Gender Budgeting hi sum hman dan tur ruahmanna satliah mai ni lovin, hmasawnna tur chi hrang hrang duannaah te, a tihpuitlinna kawngah te leh hmalak tawhna thlirletnaah te hmeichhia leh mipate dinhmun inan lohna hre chunga a rualkhai thei ang bera ruahmanna siamna hi a ni a ti bawk. Tunlai khawvelah hian chhungkuaah, ram leh hnamah hmeichhia leh mipa dinhmun inan lohna tam tak ten ngaih pawimawh an hlawh hle a, dinhmun hnuaihnung zawka ding fo thin leh chaklo zawka dah thin hmeichhiate dikna leh chanvo humhalh duhna a nasa zel a, tlawmngai pawl bakah sawrkar ngei pawhin kawng chi hrang hrangin hmeichhiate dinhmun siam that nan hma a la mek thu a sawi. Ram hmasawnna rah thate pawh hmeichhiate’n an chan ve ngei duhna a lian telh telh a, chumi atan chuan hmanraw chi hrang hrang hmangin hmalak mek a ni a ti.

Thu a sawi zelnaah SW&TA Minister Er. Lalrinawma chuan rampuma hman mek Sustainable Development Goals (SDG) 17 zinga 5-na kha intluktlanna chungchang a ni a, SDG-in a hmachhawpte zingah kum 2030-ah chuan hnufual bik awm lova intluktlanna neih theihna tura hmalak a ni a; hmeichhia leh mipate intluk tlan theih lohna awmte hnawh khah a nih a, a inchen lote inchen tir a lo nih theihna turin Gender Budgeting hi a tangkai hle a ni a ti bawk. Khawvel puma hmeichhia kum 15 chin chung lam million 641 zinga 26% te chuan an pasalte leh an kawppuite lak atangin hleilenna an tawk thin a,  kum 2021-a UN Women-in ram 13 a zir bingna a neihnaah chuan hmeichhia za zela 45% te chuan covid hripui len atang khan hleilenna an tuar thin a ni tih SDG report chuan a tarlang bawk a ni tih Minister chuan a sawi a. Hetih mek lai hian kum 2021-ah khan khawvel puma hmeichhe tleirawl 5 zela pakhat pakhatin kum 18 a tlin hmain pasal an nei a, hripui leng khan nupui pasal neih hma thlengin nghawng a nei thui hle ang tih hi a rin theih bawk a ni. Hengte anih avang hian Mizoramah pawh mipa leh hmeichhiate inthlauhna zirchianga, a khaichhuah ngai lai leh tihchak ngai laite, thawmthat ngaiahte hmalakna chak zawk a awm zel theihna turin Gender Budgeting hi ngaih pawimawh zual a ngai hle a ni tiin vawiina training pawh thlirna thar nen hlawk taka hman theihna turin a duhsakna sang ber a hlan a ni.

Vawiina Gender Budgeting Training ah hian Women & Child Development Director Pi Zoramthangi Chhangte chuan 'Mission Shakti : Gender Budgeting (SOP) - an overview' thupui sawizauna hun a hmang a. Resource Person pahnih - Social Welfare Former Director Pi Laldikkimi leh Prof. Lalhriatpuii, Dept. of Economics, MZU ten 'Gender Budgeting' chungchangah Paper Presentation neiin, a kalhmang leh thiltumte hrilhfiahna leh zirtirna hun an hmang bawk. Training hun hnung chu Pi Zonunpari Sailo, Joint Director, WCD-in lawmthu sawiin a khar a ni.