1389/2023-2024

Aizawl, the 4th August, 2023: Law & Judicial Minister Pu T.J. Lalnuntluanga chuan vawiin khan Pu Manan Kumar Mishra, Chairman, Bar Council of India chu a Office Chamber, New Delhi-ah a kawm.

Law & Judicial Minister Pu T.J. Lalnuntluanga, New Delhi-a cham mek chuan Mizoram Law College Student Bar Council-te ngenna bawhzuiin Bar Council of India Chairman Pu Manan Kumar Mishra chu kawmin tul leh pawimawhte a sawipui a. Mizoram chhunga Law Graduate te'n Law an practice theih nana pawimawh tak, All India Bar Examination (AIBE) Centre, Aizawla a awm loh avangin Guwahati, Assam emaw, Shillong, Meghalaya-ahte exam hmachhawn tura an kal a ngaih thin thu leh hei hian an tan harsatna a thlen thin thu hrilhin, Aizawla All India Bar Examination (AIBE) Centre din a nih theihna tura hma lak sak turin a ngen a ni.

Bar Council of India Chairman Pu Manan Kumar Mishra chuan Law & Judicial Minister thu thlen chu a ngaih pawimawh thu leh Bar Council of India General Council hmasa berah ngaihtuah tura an lo dah tur thu a sawi a. Aizawla All India Bar Examination Centre din a nih theih nana tul angte bawhzuia hmalak a tum thu a lo hrilh a ni. 

Law & Judicial Minister hi Pi R.Zothantluangi, Law Officer, Law & Judicial Department, Mizoram chuan a tawiawm a ni.