33/2023-2024
Champhai, the 5th April, 2023: Law & Judicial Minister Pu T.J. Lalnuntluanga, Champhai South bialtu MLA chuan vawiin chawhma dar 10:30 khan Urban PHC (UPHC) Champhai Vengthar ami chu tlawhin Official, thawktute leh khawtlang hruaitute nen Urban PHC tihchangtlun kawnga hmalak tulte sawi hovin inrawhkhawmna neih a ni.
Law& Judicial Minister Pu T.J. Lalnuntluanga chuan tanrualna tha tak hnuaia Urban PHC Vengthar tluang taka kalpui a ni leh, mipuiten an chhawr tangkai chu lawmawm a tih thu a sawi a. Hmalaknate inhriatpawhtawn a pawimawh thu sawiin, hei hian kan zavai thinlungah neitu nihna a tuh nasa lehzual dawn a ni, a ti a. Tihchangtlun leh thuamthat kawnga pawimawhte inrawntlanga sawihona hun neih a pawimawh thu sawiin, hmasawnna ruhrelte a tahtawla ngaihtuah zel tum a ni, a ti bawk.
District Bawrhsap Pu James Lalrinchhana chuan Urban PHC Champhai hmunhma felfai taka enkawl a ni leh mipuiten an chhawr tangkai dan a hmu chu lawmawm a tih thu a sawi a. Khawtlang hruaitute thlawpna fakawm a tih thu a sawi bawk a. Mipuite hriselna hlamchhiah theih a nih loh thu sawiin, thawktute theihtawp chhuah turin a fuih a ni.
He hunah hian CMO Champhai Dr. PC Lalhmingliana hnen atangin report ngaihthlak a ni bawk.
Urban PHC, Champhai Vengthar hi March 2021 thlaa bultan a ni a. Tun dinhmunah thawktu - Doctor - 1, Staff Nurse - 3, Health Worker - 2, Group D - 2, Pharmasist - 1, Lab. Tech -1, Accounts Clerk - 1 (an vaiin mi 11) an awm mek a ni.
