34/2023-2024

Aizawl, the 5th April 2023 : Vawiin khan Raj Bhawan Conference Room ah PWD hotuten Governor Dr. Haribabu Kambhampati hnenah an Department hnathawh leh hmalakna thenkhat – National Highway leh Pradhan Mantri Gram Sadak Yojana (PMGSY) chungchang presentation siamin an hrilhfiah.

Larsap chuan PWD hotute a koh chhan sawiin hna hrang hrang in kalpui mek dinhmun te, hna a hun taka zawhloh a nih chhan te leh hemi kawnga harsatna in nei te hriat ka duh a, hengte hi Ministry lamah keipawhin sawipui leh thlen ka duh vang a ni, a ti.

PWD hotute tarlan danin PWD in National Highway leh a kaihhnawih hna 5 cheng vaibelchhe 2554.98 hu an thawk mek a; heng zinga NH-108(Sairang – New Eden, Tripura) chu za zelah 94 zawh a ni tawh a ; NH-501A(Lawngtlai – Zochachhuah, KMTTP) chu za zelah 98.01 zawh tawh niin NH-2 (Seiling-Tuivai) in a huam chhunga, km 17.5 a thui chu tunhnai khan zawh fel a ni a; hna dang 2 te chu thawh mek a nib awk. Heng bakah hian National Highway hna thar 3 tan tur an nei a, hna dang 6 pawh proposal Ministry of Road Transport and Highways (MORTH) an an thehlut mek a ni. Hemi zinga Tuivai lui chunga leidawh tur chu a pawimawh em avangin hemi chungchang chu a hranpa in Larsap in Ministry lam a sawipui tur thu PWD hotute a hrilh a ni.

Pradhan Mantri Gram Sadak Yojana (PMGSY) hnuai hmalakna te chu PWD hotuten an tarlang leh a. PMGSY hi kum 2000 atanga thawh tan niin Phase 12 hnuaia Mizoram pumah project 351, kawng kilometre 4482.732 a thui cheng vaibelchhe 2840.08 man sanctioned a ni a. Heng zinga project 300 chu thawh zawh tawh niin project 51 thawh mek a ni a, sanctioned kilometre 4482.732 atangin 4247.534 a thui chu zawh tawh niin kilometre 277.735 hi an la thawk mek a. Heng project katlang hian khua 232 zinga 216 chu PMGSY kawng a nei tawh a ni. Larsap chuan Bairabi leh Sairang rel kawng inkara Railway Station 4 awm te chu a bulhnaia khua awmte nen inkawlpawhna sial a pawimawh thusawiin hemi chungchanga hmalak pawimawh a tih thu a sawi.

Mizoram chhungah National Highway sial tawh leh sial mek zawng zawng thui zawng chu kilometre 1509 a ni a, hemi zinga kilometre 650 chu PWD in a sial tawh leh hma an lak mekte a ni a; a bak chu NHIDCL in chan te an ni. Heng zinga thui ber chu tunah NH-2 tia vuah tak – Seling – Tuipang (NH-54) leh Seling Tuivai(NH-150) suihfin, kilometre 481 a thui hi a ni.